Dua Lipa ka tërhequr vëmendjen në rrjetet sociale pasi disa nga fotografitë e publikuara më herët nga pushimet e saj në jug të Shqipërisë nuk gjenden më në profilin e këngëtares.
Bëhet fjalë për pamje nga Kep Merli, një prej destinacioneve ku artistja me famë ndërkombëtare kishte kaluar pushime së bashku me familjen. Në postimet e asaj kohe, Dua e kishte përshkruar zonën si një prej vendeve më të bukura në botë, duke e promovuar para miliona ndjekësve të saj.
Fotografitë vazhdojnë të qarkullojnë në mediat shqiptare dhe në profile të anëtarëve të familjes së saj, por janë zhdukur nga faqja personale e këngëtares në Instagram.
Ky ndryshim vjen pak ditë pasi Dua Lipa mori pjesë në podcastin e akademikes Lea Ypi, ku pjesë e bisedës ishin edhe protestat kundër ndërtimeve në zonat e mbrojtura në Shqipëri dhe shqetësimet për dëmtimin e natyrës.
Nuk dihet nëse fshirja e fotografive lidhet drejtpërdrejt me diskutimin e fundit. Mund të bëhet fjalë thjesht për një riorganizim të profilit, një zgjedhje estetike ose heqjen e postimeve të vjetra. Megjithatë, momenti në të cilin kjo ka ndodhur ka ngritur pikëpyetje dhe ka bërë që veprimi i këngëtares të komentohet gjerësisht në rrjet.
Dua Lipa nuk ka dhënë deri tani asnjë shpjegim publik lidhur me arsyen pse fotot nga jugu i Shqipërisë janë hequr nga profili i saj.
