Stenaldo Mëhilli rikthehet në Top Albania Radio, këtë herë si pjesë e sezonit të ri të “Live From Tirana”, që nis transmetimin më 7 shtator.
Programi do të vijë nga e hëna në të premte, nga ora 10:00 deri në 13:00, në Top Albania Radio dhe në kanalin 10 në Digitalb. Krahas Stenaldos, pjesë e “Live From Tirana” janë edhe DJ Wizii dhe Danko DJ.
Rikthimi në radio vjen disa muaj pas eksperiencës së Stenaldos në “Big Brother VIP Albania 5”, ku ai qëndroi për rreth tre muaj dhe u bë një nga personazhet e komentuar të edicionit. Rrugëtimi i tij në reality show përfundoi më 24 mars, pas një nominimi kokë më kokë me Mateon, ku publiku vendosi që Stenaldo të largohej nga gara.
Gjatë qëndrimit në BBV, Stenaldo pati gjithashtu mundësinë të rikthehej për pak kohë në ambientet e Top Albania Radio. Produksioni e nxori përkohësisht nga shtëpia dhe e dërgoi në studiot e radios, ku e priste një surprizë me komentatorin sportiv Dritan Shakohoxha. Radio ishte vendi ku Stenaldo kishte vijuar më herët rrugëtimin e tij në gazetari.
Pas eliminimit, ai foli edhe për eksperiencën në “Big Brother VIP”, duke u shprehur se pjesëmarrjen në format e konsideronte një hap të rëndësishëm për të dhe se, pavarësisht se nuk fitoi çmimin e madh, vlerësonte raportin që kishte krijuar me publikun.
Tashmë fokusi i tij rikthehet te radioja. “Live From Tirana” do të vijojë formatin e tij të përditshëm me muzikë, intervista me personazhe të aktualitetit, të ftuar në studio dhe diskutime mbi tema të ndryshme.
Për Stenaldo Mëhillin, sezoni i ri shënon kështu një rikthim në një ambient që ka qenë pjesë e rrugëtimit të tij profesional, këtë herë pas ekspozimit që mori nga pjesëmarrja në “Big Brother VIP 5”.
