Hueyda El Saied ka qenë një ndër artistet më të komentuara gjatë kësaj periudhe. Ajo u rikthye në Shqipëri pas një periudhe të gjatë largimi në Luksemburg, një rikthim që u shoqëruar me shumë zhurmë.
Ish-balerina e ftuar pak javë më parë në “Top Magazine”, rrëfeu se i kishte dhënë fund lidhjes 5-vjeçare me partnerin francez, me të cilin ka edhe një djalë, Gabrielin.
Hueyda zbuloi se ishte tradhtia arsyeja që e çoi çiftin drejt këtij vendimi. Ditët e kaluara në Shqipëri afër miqve dhe familjarëve e kanë ndihmuar artisten simpatike të kalojë periudhën e vështirë të pas divorcit. Jo vetëm kaq, por Hueyda duket se ka nisur edhe një lidhje të re, të cilën e ka cilësuar si dashuria e parë dhe shpresonte se do të mbetej e fundit.
Rikthimi drejt Luksemburgut erdhi më shpejt edhe se sa e kishte menduar vet Hueyda. Ajo ka postuar në “Instagram” një foto së bashku me Gabrielin duke lajmëruar largimin nga Shqipëria dhe duke shprehur mirënjohje për miqtë dhe familjarët.
“Miqtë e mi Gabrieli dhe unë po kthehemi në Luksemburg aty ku jetojmë prej 5 vitesh dhe nuk e dimë kur do të vijmë përsëri në Shqipëri. Ndërkohë doja t’ju falënderoj të gjithëve për mbështetjen, inkurajimet, fjalët e ngrohta dhe respektin që na keni dëshmuar përgjatë këtij muaji që kaluam në Shqipëri. Një mikesha ime para disa ditësh më tha: ‘Po mos i trego të gjitha sekretet e tua…’ E di që ka të drejtë, ndonjëherë duhet dhe t’jua kursej ndonjë “çmenduri”, por unë nuk harroj kurrë që si artiste ekzistoj falë jush, falë duartrokitjeve, inkurajimit dhe kritikave tuaja. Për më tepër kam lindur dhe jam rritur në Tiranë, ku në çdo hap që hedh ndesh një pediatre që më ka vizituar kur isha fëmijë, nje shitëse që më ka shitur akulloren e parë, një mësuese që më ka mësuar alfabetin, një mikeshë me të cilën kemi luajtur syllambyllasi, e plot njerëz të tjerë të cilët më kanë mësuar dhe dhuruar aq shumë sa që nëse do të filloja të shisja mend e të fluturoja do të më tregonin diçka që do të më sillte direkt në tokë…. Me pak fjalë, kam vendosur të ndaj me ju jo vetëm gëzimet apo sukseset e mia, por dhe lëndimet dhe dhimbjet e një njeriu që nuk harron nga vjen… Ka njerëz që paguajnë psikanalistët për të bërë një terapi, unë kam fatin ta bëj këtë terapi me ju. Faleminderit për gjithçka! P.s – Nona, teze Opa dhe mami më mori malli dhe pse vetëm 1 h 30 minuta larg jush.”: ka shkruar Hueyda.
