Shefja e Repartit Infektiv në QSUT, Najada Çomo, ka folur sot për herë të parë në media për Covid-19 pas disa muajsh heshtjeje. Në një rrëfim në emsionin “Open” në Top Channel, Çomo ka thënë se kjo ka qenë periudha më e vështirë në të gjithë jetën e saj, duke u shprehur se ky virus është i tmerrshëm, pasi vuajtjet që shkakton tek të prekurit janë të shumta.
Më tej mjekja ka treguar dhe rastet e humbjeve të jetëve në spital dhe tha se ajo ka informuar familjarët për vdekjen e të afërmëve të tyre.
“Kjo është periudha më e tmerrshme gjatë gjithë punës sime. Ky është një virusi i rrezikshëm dhe i tmerrshëm. Virusi transmetohet shumë shpejt dhe shkakton vuajte shumë të mëdha tek ata që preken. Po ashtu dhe fatalitetet janë të shumta me këtë virus. Unë kam qenë personi që kam informuar familjarët për humbjet e jetëve në spital. Imagjoni që unë ata njerëz nuk i njihja dhe ka qenë një situatë shumë e vështirë që e kam përjetuar gjithë këto kohë. Shumë herë kam derdhur lotë me kolegët për humbjen e jetëve të këtyre personave”, shtoi Çomo.
E pyetur nëse ndonjë pacient ka lënë ndonjë amanet në fund të jetës, e teksa nisi të rrëfente Çomo u përlot dhe tha ai është momenti më i vështirë për të.
Çomo u shpreh se sot ka dalë që t’u thotë qytetarëve se virusi është mes nesh dhe po merr jetë njerëzish dhe të gjithë duhet ta besojnë.
Sipas saj, grupmosha e qytetarëve që preken nga koronavirusi është ulur rëndshëm në Shqipëri, vdekjet janë shtuar dhe gjendja është e rëndë.
Ndër të tjera, ajo shtoi se temperaturat e larta në këto kohë e kanë përkeqësuar gjendjen shëndetësore të njerëzve të infektuar dhe se vdekjet vijnë edhe si pasojë e këtyre kushteve.
