Pas dënimit të dy futbollistëve shqiptarë, Xherdan Shaqiri dhe Granit Xhaka për gjestin e shqiponjës që bënë në ndeshjen me Serbinë, ka pasur një valë të madhe reagimesh nga shqiptarët anembanë.
Dy futbollistët rrezikonin pezullimin nga Botërori, por fatmirësisht FIFA nuk shkoi në ekstrem. Gjithsesi ata u dënuam me 10 mijë franga zvicerane gjobë secili.
Ky vendim nuk është pritur mirë as nga kreu i Bashkisë së Tiranës, Erion Veliaj, i cili në një status në Instagram ka sqaruar për FIFA-n, se çdo të thotë gjesti i shqiponjës për ne shqiptarët:
“E dashur FIFA mund të jesh më e mirë se kaq! Shenja e shqiponjës është njësoj me qepalla ose një shenjë ‘OK’, është një lloj simboli mes shqiptarësh që vjen nga Toka e Shqiponjave! Si për këngëtarët Rita Ora, Dua Lipa, Ermal Meta dhe për futbollistët Xherdan Shaqiri dhe Granit Xhaka është motiv gëzimi dhe jo konflikti”, ka shkruar ai në postimin ku shfaqet me Rita Orën.
Megjithatë, Xhaka dhe Shaqiri mund të paguajnë mos asgjë, pasi një iniciativë e dy kosovarëve, Drin Zatriqit dhe Rilind Rekës, për ngritje fondesh për të paguar gjobën ka gjetur përkrahje të gjerë edhe mes përfaqësuesve të politikës.
