Këngëtarja shqiptare, Dua Lipa, ka regjistruar emrin e saj si markë në Zyrën për Pronësi Intelektuale në Angli dhe tani është duke parë mundësinë që të përfitojë nga suksesi i saj dhe të zgjerojë burimet e të ardhurave financiare.
“Dua ka pasur vit të suksesshëm, sidomos kur fitoi çmimin si Artistja me Depërtimin më të mirë dhe Artistja më e mirë britanike, por ajo ka një turne ku do të fitojë më shumë para”, ka thënë ky burim për “The Sun”.
Regjistrimi i emrit do t’i nevojitet asaj për të shitur veshje, këpucë, kozmetikë dhe madje edhe artikuj.
“Lançimi i linjave të rrobave, parfumeve apo grimit do t’i krijonin asaj të ardhura ndaj janë marrë hapa që kjo të ndodhë”, ka shtuar burimi.
Dokumentet që ka dorëzuar gjithashtu paralajmërojnë se ajo do të përdorë emrin e saj për të promovuar muzikën e saj me incizimet dixhitale. Dua gjithashtu po bën famë në SHBA dhe ka vendosur të udhëtojë në Amerikën e Veriut këtë verë.
Trendi i regjistrimit të emrave është mjaft i njohur mes të famshmëve. Beyonce dhe Jay Z kanë aplikuar gjithashtu për të mbrojtur emrat e dy binjakëve të tyre, për t’i përdorur më pas për qëllime fitimi ose për t’i parandaluar të tjerët ta bëjnë këtë gjë.
