Emisioni “E diela Shqiptare” është një ndër programet më të ndjekura nga shqiptarët. Nën drejtimin e Ardit Gjebreas dhe më një sërë rubrikash mjaft interesante ky program mban të gozhduar pas ekranit publikun shqiptar çdo të diel.
Prej gati 10 vitesh jemi mësuar ta shikojmë me të njëjtën skenografi, e cila është kthyer në një imazh identifikues për këtë emision. Por ditën e sotme Ardit Gjebrea nëpërmjet një postimi në Instagram ka ndarë me fansat e tij lajmin se së shpejti “E diela Shqiptare” do të ketë një skenografi të re e cila do të realizohet nga profesor Gaetano Castelli.
“Në studion e prof. Gaetano Castelli duke punuar për skenografinë e re të ‘E diela shqiptare’. Faleminderit maestro”, shkruan Arditi krahas fotos ku shfaqen pamjet e para të skenografisë së re.
Një burim për “Iconstyle.al” ka zbuluar se skenografia e re e spektaklit “E diela Shqiptare” do të jetë shumë teknologjike, ku baza do të jetë ndriçimi dhe grafika.
Gjithçka do të riformatohet tek “E diela Shqiptare”, që nga skenografia e deri tek rubrikat, ndërsa të njëjtë do të mbeten pa dyshim publiku dhe Ardit Gjebrea.
Surprizat e shumta që na presin tek emisioni “E diela Shqiptare” do të zbulohen në muajin shtator me nisjen e sezonit të ri.
