Parlamenti i Kosovës ka refuzuar një ligj të ri që do të lejonte çiftet e të njëjtit seks të krijojnë partneritete civile.
Vetëm 28 nga 120 deputetë votuan pro projektligjit të propozuar nga qeveria e kryeministrit të majtë Albin Kurti.
Qeveria e Kosovës kishte shpresuar të bëhej vendi i parë me shumicë myslimane që do të njihte bashkimet e të njëjtit seks.
Projektligji i propozuar ishte gjithashtu pjesë e reformave civile të Kosovës, të mbështetura nga Bashkimi Evropian.
Kryeministri Kurti u kishte kërkuar deputetëve që ta miratojnë projektligjin sepse “të drejtat na takojnë neve, ato janë të të gjithëve”.
Por pas një debati të ashpër, disa deputetë – duke përfshirë ligjvënës nga Vetëvendosje e Kurtit – votuan kundër legjislacionit.
“Vetëm martesa e seksit të kundërt është e pranueshme,” tha Labinote Demi Murtezi, “çdo lidhje përtej këtij kombinimi konsiderohet shthurje dhe degjenerim moral”.
Në fillim të këtij muaji, delegacioni i BE-së në Prishtinë i kishte kërkuar parlamentit të Kosovës të miratojë një reformë të bashkimeve të të njëjtit seks, si dhe ligje të tjera për të drejtat e pakicave dhe biznesin.
“Dështimi i miratimit të kodit civil do të ketë pasoja serioze negative në shumë aspekte të jetës së qytetarëve dhe bizneseve të Kosovës, si dhe në zhvillimin ekonomik të Kosovës”, paralajmëroi delegacioni në një deklaratë.
Pavarësia e Kosovës deri më tani është njohur nga rreth 100 vende, përfshirë Shtetet e Bashkuara dhe shumica e vendeve të BE-së, por jo nga Serbia.
