Kjo e martë pritet të karakterizohet nga kushte të paqëndrueshme atmosferike në të gjithë territorin e vendit. Moti do të jetë kryesisht i vranët që në orët e para të mëngjesit, ndërsa reshjet e shiut do të shtrihen në pjesën më të madhe të rajoneve, veçanërisht në zonat qendrore dhe veriore. Intensiteti i reshjeve do të jetë mesatar në orët e paradites, por me kalimin e ditës pritet një përmirësim i përkohshëm i kushteve.
Pas mesditës, reshjet do të lokalizohen kryesisht në zonat malore në lindje dhe veri të vendit, ku herë pas here mund të jenë në formë shtrëngatash afatshkurtra. Megjithatë, në mbrëmje parashikohet që vranësirat të rikthehen sërish në pjesën më të madhe të vendit, duke sjellë reshje të reja shiu në ultësirën perëndimore dhe zonat bregdetare.
Temperaturat e ajrit kanë shënuar një rënie të lehtë krahasuar me ditët e mëparshme. Në orët e para të mëngjesit, termometri u regjistrua rreth 9°C, ndërsa gjatë ditës maksimalja pritet të arrijë deri në 17°C, duke krijuar një ndjesi të freskët tipike për stinën.
Era do të fryjë mesatare deri e fortë me shpejtësi deri në 15 metra në sekondë, kryesisht nga drejtimi jugperëndimor, duke sjellë dallgëzim në brigjet detare deri në 4 ballë.
Sipas parashikimeve meteorologjike, moti i paqëndrueshëm do të vazhdojë edhe në ditët në vijim, ndaj qytetarëve u këshillohet të kenë kujdes gjatë udhëtimeve dhe të mos neglizhojnë masat ndaj lagështirës dhe erës së fortë.
