“Paqja qoftë me të gjithë ju!“- ky ishte mesazhi i parë i Papa Leo XIV në Instagram, një përshëndetje e thjeshtë, por me jehonë globale, që shënoi nisjen e tij në një nga platformat më të mëdha sociale në botë.
Vetëm disa orë pas postimit të parë, profili i Papës grumbulloi mbi 12.9 milionë ndjekës, duke vendosur një rekord të ri për lidershipin fetar në rrjete sociale. Ky debutim i bujshëm vjen si pjesë e strategjisë së re të Vatikanit për të qenë më pranë besimtarëve, veçanërisht të rinjve, në një botë gjithnjë e më të lidhur dixhitalisht.
Rruga dixhitale e Vatikanit ka nisur prej më shumë se një dekade, që kur Papa Benedikti XVI hapi profilin e parë në Twitter në vitin 2012, një hap që atëherë u konsiderua revolucionar. Papa Leo XIV, me këtë lëvizje, jo vetëm ndjek gjurmët e paraardhësve, por afirmohet si një figurë fetare që i flet botës edhe përmes gjuhës së teknologjisë.
