Në një nga ditët më të shenjta për botën katolike, të hënën e Pashkëve, Papa Françesku u nda nga jeta në moshën 88-vjeçare. Pas ndarjes së tij nga jeta, BBC ka publikuar testamentin e plotë të Papës, një dëshmi e thellë shpirtërore dhe përulësie.
Në rreshtat prekës të shkruar prej tij, Papa shpreh qartësisht dëshirën e fundit: që mbetjet e tij të prehen në Bazilikën Papale të Shën Mërisë së Madhe, një vend ku ai ndalej gjithmonë për t’u lutur në fillim dhe fund të çdo udhëtimi apostolik.
“Ndërsa muzgu i jetës sime tokësore po afrohet, me shpresë të patundur në jetën e përjetshme, dëshiroj vetëm të shpreh vendin e varrimit tim,” shkruan ai.
Papa kërkon që varri të jetë i thjeshtë, pa zbukurime, me vetëm mbishkrimin: “Françesku”, duke dëshmuar përkushtimin e tij të përjetshëm ndaj thjeshtësisë dhe përulësisë që e karakterizuan gjatë gjithë papatit.
Shpenzimet për këtë ceremoni, siç tregon dokumenti, do të mbulohen nga një dhurues anonim, ndërsa për realizimin e çdo detaji, Papa ia ka besuar kardinalit Rolandas Makrickas.
Në fund të testamentit të tij, një mesazh mirënjohës dhe përulës:
“Zoti u dhëntë shpërblimin e duhur të gjithë atyre që më kanë dashur dhe luten për mua. Vuajtjen time të fundit ia ofroj Zotit për paqen në botë dhe vëllazërinë midis popujve.”
Një fund i denjë për një jetë të përkushtuar ndaj fesë, njerëzimit dhe dashurisë së pakushtëzuar.
