Papa Françesku doli sot nga spitali, teksa doktorët kanë thënë se atij do t’i nevojiten edhe dy muaj pushim.
“Faleminderit për lutjet tuaja, le të lutemi për paqe“, iu drejtua Papa besimtarëve nga ballkoni i spitalit.
Ati i Shenjtë, 88 vjeç, ishte shtruar në spitalin “Xhemeli” të Romës më 14 shkurt, pasi pati vështirësi në frymëmarrje për disa ditë. Fillimisht ai u trajtua për bronkit përpara se të diagnostikohej me pneumoni në të dyja mushkëritë.
Papa zakonisht e bën lutjen e përjavshme të dielave në sheshin e Shën Pjetrit, por ai nuk ka qenë në gjendje ta bëjë këtë që prej datës 9 shkurt, para se të shtrohej në spital.
Vatikani ka thënë se nuk pritet që lutja e Françeskut të mbahet këtë të diele, për arsye se atij i duhet ende kohë për t’u rikuperuar nga pneumonia, por ka shtuar se ai do të dalë në dritare për t’i përshëndetur besimtarët.
Gjatë kësaj periudhe, “mjekët e kanë këshilluar të shmangë takimet në grup me njerëz që ndoshta kanë fëmijë dhe për këtë arsye mund të bartin viruse dhe infeksione”, shpjegoi ekipi mjekësor.
