Një 25-vjeçar pakistanez u arrestua këtë pasdite nga Policia Hekurudhore në Stacionin Qendror të Milanos, pasi dyshohet se sulmoi një grup qytetarësh hebrenj amerikanë që po prisnin trenin. Sulmi ka ndodhur papritur dhe ka shkaktuar lëndime tek një nga burrat e grupit, i cili u godit me grushte dhe shqelma, duke pësuar plagë në kokë dhe duke u shtruar më pas në spital.
Sipas hetimeve, autori fillimisht ka përdorur fjalë fyese dhe shprehje me motive racore, etnike dhe fetare ndaj viktimave, para se t’i sulmonte fizikisht. Incidenti u dokumentua nga kamerat e sigurisë të stacionit, të cilat tregojnë qartë fillimin e konfliktit dhe agresionin e drejtuar ndaj grupit.
Reagimi i shpejtë i policisë dhe i oficerëve të stacionit ndihmoi në ndalimin e autorit, ndërkohë që disa pasagjerë u përpoqën të ndërhynin dhe t’i ofronin ndihmë viktimës deri në mbërritjen e emergjencës.
25-vjeçari, i cili sapo kishte mbërritur në Milano me tren, po mbahet nën hetim dhe autoritetet po punojnë për të sqaruar të gjitha rrethanat e sulmit. Policia po shqyrton gjithashtu motive të tjera të mundshme pas këtij akti.
Ngjarja ka shkaktuar shqetësim të madh te komuniteti lokal dhe autoritetet italiane kanë bërë thirrje për qetësi, duke garantuar se do të merren të gjitha masat për të parandaluar incidente të ngjashme në stacionet hekurudhore.
