Bëhet fjalë për fluturimin LH1753 me destinacion Mynihun, i realizuar me një Airbus A321 që kishte në bord 177 pasagjerë dhe 7 anëtarë ekuipazhi. Avioni u ngrit nga Athina në orën 18:19, por vetëm pak minuta më vonë pilotët njoftuan se duhej të ktheheshin menjëherë për arsye sigurie.
Sipas mediave greke, problemi teknik u evidentua gjatë fluturimit dhe rreth orës 18:35 u kërkua kthimi emergjent në aeroport. Ulja u realizua pa probleme, por menjëherë pas ndalimit të avionit u aktivizuan procedurat e evakuimit emergjent. Stjuardesat hapën dyert dhe përdorën rrëshqitëset fryrëse, duke urdhëruar pasagjerët të dilnin me shpejtësi nga kabina.
Në pistë u vendosën automjete zjarrfikëse dhe forca sigurie, ndërsa ekipet e emergjencës asistuan pasagjerët. Autoritetet konfirmuan se të gjithë janë në gjendje të mirë shëndetësore, me vetëm dy lëndime të lehta gjatë evakuimit.
Megjithatë, udhëtimi drejt Mynihut nuk përfundoi aty. Në fluturimin e radhës, një pasagjer i moshuar humbi ndjenjat në bord dhe ekuipazhi konsideroi një tjetër ulje emergjente, derisa një mjek që ndodhej në avion i dha ndihmën e parë.
Më vonë, gjatë afrimit në Mynih, avioni hasi sërish vështirësi në ulje, duke prekur pistën dhe më pas duke u ngritur sërish për disa minuta, përpara se të ulej përfundimisht në mënyrë të sigurt. Në aeroportin e Mynihut u vunë në dispozicion edhe psikologë për pasagjerët e tronditur nga ngjarja.
