Sipas të dhënave nga UN Women, pandemia po zhduk 25 vite të arritjeve në fushën e barazisë gjinore. Gjatë kësaj kohe gratë po bëjnë më shumë punë në shtëpi dhe po kujdesen akoma më tepër për familjet e tyre. Nga ana tjetër mundësitë për punësim dhe arsim janë më të pakta e kjo ndikon shumë në shëndetin mendor e fizik të grave, duke e dobësuar atë.
38 hulumtimet e kryera nga UN Women kryesisht u përqendruan në vendet me të ardhura të ulëta dhe të mesme, të dhënat nga vendet më të industrializuara tregojnë të njëjtën situatë. Të dhënat e raportit të UN nënvizojnë se “më alarmante është fakti që shumë gra në të vërtetë nuk po i rikthehen punës”. Nga ana tjetër në vendin tonë, përveç pandemisë, edhe dy tërmetet e fuqishme të vitit të shkuar kanë ndikuar ndjeshëm në sipërmarrjet e drejtuara nga gratë.
Pandemia shton dhunën ndaj grave
Pandemia ka ndikuar edhe në shtimin e rasteve të grave të dhunuara. Kombet e Bashkuara thanë se që nga shpërthimi i COVID-19, të gjitha llojet e dhunës ndaj grave dhe vajzave, veçanërisht dhuna në familje, janë intensifikuar. Vitin e kaluar, 243 milionë gra dhe vajza kanë përjetuar dhunë seksuale ose fizike nga partneri i tyre. Këtë vit, raportet e rritjes së dhunës në familje, ngacmimit në internet, martesave në moshë të mitur, ngacmimeve seksuale dhe dhunës seksuale janë shtuar së tepërmi, sipas drejtoreshës Ekzekutive të OKB-së për Gratë, Phumzile Mlambo-Ngcuka
Në Shqipëri ndodh e kundërta, gratë kanë frikë të raportojnë dhunën
Mirëpo gjatë periudhës së pandemisë në Shqipëri ka ndodhur e kundërta, të paktën në atë çfarë tregojnë shifrat e policisë. Në muajin mars të këtij viti, kur pandemia mbërriti në vendin tonë, janë raportuar 141 raste dhune në familje më pak krahasuar me muajin mars 2019. Por kjo nuk do të thotë se pandemia nuk ka nxitur dhunën në familjet shqiptare.
Pedagogia dhe aktivistja, Iris Luarasi, është shprehur se në linjën e këshillimit për gra dhe vajza, 116-117, ka pasur trefishim të telefonatave që raportonin për dhunë brenda familjes. Nga ana tjetër shifrat në polici tregojnë të kundërtën, sepse gratë kanë frikë të denoncojnë dhunën ndaj tyre.
“Ende nuk është bërë një studim për këtë fakt por personalisht mendoj se kjo ndodhi gjatë periudhës së karantinës pasi gratë kishin frikë ta raportonin burrin në polici ndërkohë që e kishin 24 orë në shtëpi, dhe për fat të keq në shumicën e rasteve gratë e dinë që është burri që sjell të ardhura në shtëpi dhe mendonin më mirë të duronin dhunën se të linin fëmijët pa bukë“, është shprehur Luarasi në emisionin “Wake Up”.
Edhe më herët aktiviste të tjera janë shprehur se në këto kushte të vështira ekonomike që po kalojnë gjithë vendet, grave ju duket luks që të raportojnë dhunën. Ashtu siç ka ndodhur përherë në Shqipëri, shumica e tyre zgjedhin të durojnë dhunën, se sa të shpëtojnë jetën e tyre, për hir të fëmijëve.
