Kushtet për art këtë vit kanë qenë mjaft të kufizuara, por pandemia nuk i ka ndaluar piktorët e peizazhit për t’u mbledhur sërish në ekspozitën e tyre tradicionale “Plein Air”. Ata nuk mundën të organizoheshin në koloni për shkak të Covid-19, por ja dolën mbanë që të risillnin edhe këtë herë peizazhet e tyre në tablo.
Në 60 vepra të punuara nga piktorë të njohur si Agim Kadillari, Agron Polovina, Arsen Kurti, Buron Kaceli, Kujtim Buza, Nikolin Ivanaj, Pashk Pervathi, Sefedin Stafa, Xheneta Kadillari, Vangjo Vasili, Spiro Panariti e Rikarda Nenshati, mund të identifikohen lehtësisht disa nga peizazhet më të bukura shqiptare. Kryetari i grupit të artistëve “Plein Air”, Agron Polovina shprehet se këta piktorë e kanë shumë të rëndësishme të rivlerësojnë dhe vazhdojnë traditën shumë të mirë mbi peizazhin shqiptar, ndaj çdo vit vijnë me një ekspozitë të tillë.
Ekspozita “Plein Air” është hapur në kushte të jashtëzkaonshme, por piktorët thonë se e kishin mjaft të rëndësishme që të mos e zhvillonin atë online, por ta lejonin publikun t’i shijonin tablotë duke i parë vetë me sy.
“Çdo vit ne kemi shumë punë gjatë kohëve që punojmë, por ekspozimi është më i rëndësishëm për ne. Nëse ne nuk do të ekspozojmë, çfarë rëndësie ka që punojmë? Direkt shikimi i punëve nga njerëzit në përgjithësi është më e rëndësishme se sa nëpërmjet internetit online. Edhe ajo bën punën e vet, por ndjeshmëria artistike nuk ka të krahasuar me atë që të jep shikimi direkt i tablosë së pikturës. Për ne ishte e domosdoshme ta hapnim këtë ekspozitë. Dhe për njerëzit është gjë e mirë të bëjnë një shkëputje nga rutina e përditshme, të vijnë të shikojnë pikturat dhe të shijojnë këtë art. Arti gjithmonë është çelësi që të largon shumë strese. Një terapi shumë e mirë nga ana psikologjike”, është shprheur piktorja, Xheneta Kadillari.
Ekspozita “Plein Air” do të qëndrojë e hapur në Muzeun Historik Kombëtar deri në datë 11 dhjetor.
