Në raportin e tij më të fundit, Eurostati ka tërhequr vëmendjen, ku ka treguar se sa shumë shpenzojnë në këto kohë pandemie shtetet në Europë nga Prodhimi i Brendshëm Bruto (PBB-ja) e tyre për shëndetësinë, ndërsa Shqipëria renditet e fundit.
Bazuar në të dhënat e këtij raporti, vërehet se Shqipëria renditet e fundit në Europë sa u takon shpenzimeve për shëndetësinë, madje me një hendek të madh krahasuar edhe me vendin e parafundit që është Rumania.
Bëhet me dije se në vitin 2018, Shqipëria akordoi 2.9% të PBB-së si fonde për shëndetësinë.
Të dhënat tregojnë se Shqipëria shpenzon vetëm një të katërtën e mesatares europiane për këtë sektor jetik publik.
Dobësitë e vendit tonë lidhen me rendimentin e dobët në grumbullimin e të ardhurave në raport me PBB-në.
“Për shkak të rezultateve të dobëta fiskale, Shqipëria ofron mbështetjen më të ulët buxhetore në raport me PBB për të gjithë sektorët, duke përfshirë edhe ata prioritarë si arsimi, shëndetësia, mbrojtja sociale, siguria publike etj”, thuhet në raportin e publikuar.
Shqipëria në raport me rajonin
Bazuar në të dhënat e grumbulluara për të gjitha vendet në BE, Eurostat ka treguar se cilat vende kanë fokusuar buxhetet e tyre në shëndetësi dhe cilat nga vende më pak.
Sipas të dhënave të Eurostat, vendet e BE-së vitin e kaluar grumbulluan mesatarisht 41.1% të ardhura të PBB-së, ndërsa Shqipëria grumbulloi të ardhura vetëm 27.4% të PBB-së së saj.
Shqipëria hyn në grupin e vendeve europiane si Kosova dhe Rumania që e kanë të ulët rendimentin fiskal, për shkak të dobësive në grumbullimin e të ardhurave dhe nivelit të lartë të informalitetit.
Sikur mos të mjaftonte, Shqipëria i përkeqësoi rezultatet më 2019, pasi të ardhurat në raport me PBB shënuan rënie me 0.2 pikë përqindje.
Mesatarisht në BE, shpenzimet e kujdesit shëndetësor arritën në 9.9% të PBB-së në 2018.
Midis shteteve anëtare në unionin evropian, pjesët më të mëdha u regjistruan në Gjermani (11.5% të PBB) dhe Francë (11.3%), ndjekur nga Suedia (10.9%) .
Ja cilat vendet kanë shpenzuar më pak
Pjesa më e ulët e shpenzimeve të kujdesit shëndetësor është regjistruar në Luksemburg (5.3% të PBB), Rumani (5.6%) dhe Shqipëri me 2.9%
Lidhur me madhësinë e popullsisë, shpenzimet e kujdesit shëndetësor ishin më të larta në mesin e shteteve anëtare të BE-së, si në Danimarkë, Luksemburg dhe më të ulëtat në Rumani, Bullgari dhe në Shqipëri.
Vendet që kanë shpenzuar më shumë
Në rajon, shpenzimet më të larta për sektorin e shëndetësisë i ka Bosnja, e cila akordoi vitin e kaluar 8.8% të PBB-së.
Bosnja ka shpenzime më të larta të PBB për të gjithë sektorët në raport me shtetet e tjera të rajonit, pasi mbledh më shumë të ardhura në raport me PBB-në e saj, me rreth 43%.
Aparatura që po shihni në foto është prodhim i firmës zviceriane “Roche”, e quajtur “Cobas 6800”, e cila kryen tamponin.
Nga një komunikim i “iconstyle.al” me përfaqësuesin e kësaj firme në Shqipëri, disa javë më parë na u bë me dije se kjo aparaturë kushton 320 mijë euro dhe kryen 384 teste në orë, që përkthehen në 9,240 teste në ditë.
Kjo do të thotë se një laborator në vendin tonë me çmimin 95 euro të tamponit arkëton 877,800 euro në ditë dhe për 30 ditë 26, 334,000 euro. Pra, përfiton shifra marramendëse, kur kostot duken të papërfillshme.
Sipas asaj që kanë deklaruar disa nga mjekët më të njohur të vendit tonë një pajisje, që quhet ECMO, pajisje e kujdesit intensiv, shumë e vlefshme për të shpëtuar jetët e pacientëve të intubuar i mungon vendit tonë.
Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne.
Disa kohë më parë shefi i Kardiokirurgjisë në QSUT, Edvin Prifti tha në një intervistë se kjo pajisje bën oksigjenimin artificial të gjakut, duke lënë në qetësi mushkëritë, në këtë mënyrë ndihmon pacientët e intubuar nga Covid-19.
Sipas Priftit 50% të të sëmurëve që janë në ECMO dhe janë me Covid kanë arritur të mbijetojnë.
Ndër të tjera ai u shpreh:
“Në varësi shkon nga 60-70 mijë euro. Në një emision Arben Gjata na e premtoi se kishte një premtin nga universiteti i Barit për të bërë disa dhurata për aparate të tilla, por më pas nuk e di çfarë u bë.”
Me një llogari të thjeshtë, për 10 pajisje ECMO që i duhen vendit tonë sipas ekspertëve, me nga 70 mijë euro (referuar deklaratës së Edvin Priftit) do duheshin 700 mijë euro./Iconstyle.al/
