Panairi i Librit hapi siparin ditën e sotme në kushte krejtësisht të jashtëzakonshme. Ndryshe nga vitet e tjera që Pallati i Kongreseve gumëzhinte nga zhurmat e njerëzve, këtë herë është i qetë, duke qenë se edicioni i 23-të i Panairit mbahet online.
Kushdo nga lexuesit që dëshiron të blejë një libër duhet të shkarkojë aplikacionin “Panairi i Librit” dhe të bëjë prosinë online.
Si funksionon aplikacioni?
Përpara se të bëni një blerje duhet të krijoni një profil në aplikacion me emrin tuaj të plotë dhe me të dhënat kryesore si numër celulari dhe adresë e saktë. Më pas mund të kërkoni librin që dëshironi, të merrni informacion rreth tyre, ose të kërkoni në shtëpitë botuese. Pasi të keni zgjedhur librin e preferuar, duhet të klikoni “shto në shportë” dhe më pas të përfundoni porosinë tuaj. Më pas një postier do të sjellë librin në shtëpi dhe tarifa e dorëzimit varion në bazë të vendbanimit tuaj.
Aktivitete për librin online dhe në ambiente të hapura
Organizuesit e Panairit të Librit kanë përgatitur një plan të mirëfilltë për organizimin e aktiviteteve. Ceremonia e hapjes së Panairit të Librit u mbajt sot në atriumin e Muzeut Kombëtar, ndërkohë që gjithë aktivitetet e tjera janë mbajtur në vende të ndryshme e janë transmetuar në faqen e Shoqatës së Botuesve Shqiptarë.
Kryetari i Shoqatës së Botuesve, Petrit Ymeri, është shprehur prej kohësh se një pjesë e tyre do të transmetohen live, ndërsa disa të tjerë do të regjistrohen e do të transmetohen përmes ekraneve të mëdha në pika të ndryshme të kryeqytetit.
Pandemia përgjysmon pjesëmarrjen, mungojnë 50 subjekte
Pandemia e koronavirusit ka reduktuar me 50% pjesëmarrjen e subjekteve këtë vit, për shkak të mungesave kryesisht nga botuesit e Kosovës.
“Nuk kemi pjesëmarrje fizike nga botuesit e Kosovës, ndoshta kanë ndikuar edhe problemet e reja. Ato do të jenë në lidhje online me ne. Çdo vit marrin pjesë institucione të ndryshme të vendit apo të huaja. Por këtë vit nuk do të jenë të pranishme”, është shprehur kryetari i Shoqatës së Botuesve, Petrit Ymeri.
Panairi i librit do të finalizohet në 15 nëntor me ndarjen e çmimeve ashtu si çdo vit tjetër. Tradita e tyre do të jetë po e njëjtë, që do të thotë se edhe këtë herë do të jepet çmimi i Autori më i mirë, Përkthyesi më i mirë edhe çmimi i Letërsisë për fëmijë.
