Ditën e sotme pas vitesh, u rikthyen në atdhe katër fëmijët dhe gruaja e parë nga kampi i Al-Holit në Siri. Gjysmëhëna e Kuqe siriane në bashkëpunim me autoritetet vendase dhe qeverinë shqiptare kanë mundur që të kthejnë në vendlindje Floresha Rashën dhe tre fëmijët e saj, Amar, Emel dhe Hatixhe.
Bashkë me ta do të rikthehet edhe Endri Dumani, i cili tanimë i ka mbushur 14 vjeç. Ndërkohë mbetet ende mister fati i motrës së tij, Evës, e cila nuk pranoi që të kthehej në Shqipëri.
Kryeministri Edi Rama pak pas mbërritjes në Rinas bashkë me 4 fëmijët e riatdhesuar nga kampi Al-Hol në Siri drejt vendit tonë, u ndal në një konferencë për mediat.
Kreu i qeverisë tha se tashmë është krijuar baza dhe se do të vijojë faza tjetër për të kthyer në Shqipëri pjesën tjetër të shqiptarëve të bllokuar në atë kamp.
“Është një arsye e pazakonshme. Më vjen shumë mirë që kemi mbyllur fazën e parë të një operacioni të ngatërruar. Sidoqoftë të suksesshëm dhe ajo që është edhe më e rëndësishme është se tanimë kemi bazën për të vazhduar me fazën e dytë. Fëmijët e tjetër janë identifikuar. Janë bërë një pjesë e mirë e kontakteve dhe intervistave. Dhe besoj se më herët dhe vonë do të kthejmë dhe pjesën tjetër në Shqipëri.”, tha Rama.
Rama deklaroi se rruga për të riatdhesuar shqiptarët e bllokuar në Siri, fëmijë e të rritur, është e vështirë dhe mes labirintheve.
Gjatë fjalës së tij, kreu i qeverisë u pyet në lidhje me faktin se sa është numri i fëmijëve që ndodhen aktualisht në Siri, ai u mundua që të ishte i rezervuar për këtë pjesë.
“Prej disa javësh e kemi ngritur këtë strukturë. Vendimin për të hyrë në territor është marrë në momentin e duhur. Ne ishim gati qysh më parë. Jo vetëm për këta 4 fëmijë, por dhe të tjerët. Do të jemi nën kujdesin e tyre, me mësues, psikolog, me fëmijën, duke i integruar në strukturat e posaçme. Nuk diskutohet, se kush ka bërë krim, do i nënshtrohet drejtësisë. Këto nuk janë çështje të mijat. Rastet individuale janë të tilla. Do i ndjekin institucionet rrugët ligjore. Ne jemi duke ndjekur shtetasit shqiptarë. Situata do të ishte më e komplikuar dhe e pamundur. Thash që nuk bëhet fjalë për një rrugë, por për një labirinth. Ka shumë faktorë dhe pengesa që duhen kapërcyer. Struktura jonë e anti-terror e ka treguar veten dhe në raste të tjera. Veprimtaria e saj është larg syve të publikut e lavdi Zotit dhe të medias. Nuk mund të jap asgjë ekzakte, pasi së pari të gjitha identifikimet janë në përpunim e sipër nga strukturat përkatëse.”, tha Rama.
