Disa ditë më pare, Prokuroria e Krimeve të Rënda kërkoi 12 vite burg për ministrin e brendshëm Saimir Tahiri.
Tahiri akuzohet për “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal” në kuadër të dosjes ‘Habilaj’.
Për efekt gjykimi të shkurtuar kërkesa u ul me 8 vite burg.
Ditën e sotme, ai është paraqitur në sallën e gjyqit.
Sipas “lapsi.al”, teksa intervistonte avokatin e ish-ministrit, gazetarja Klodiana Shala është shprehur se Tahiri ishte përlotur në sallën e gjyqit.
Mirëpo, avokati i tij, Maks Haxhia, e ka mohuar duke thënë se nuk ishte në lot, thjesht ishte në një gjendje emocionale.
“Nuk ishte në lot, ai ka dhënë mandatin për këtë, ka treguar se është burrë. Ishte një gjendje emocionale, sepse vihet në rrezik jeta e tij. Në vend që të vlerësohej për punën si ministër, ai vihet përballë akuzave, kur nuk ka asnjë provë. Të gjykosh ish-ministrin për vepra tepër të rënda, pa asnjë provë, është të ulërasësh, të hipësh mbi tavolina. Me aq sa e njoh dosjen dhe e njoh shumë mirë, nuk e di ku gjykata, në rast çmendurie, do ta gjejë një provë të vetme”- u shpreh Haxhia.
Ndërkohë, ish-ministri do të vazhdojë të qëndrojë në ambientet pranë gjykatës, derisa të merret vendimi në orën 16:00.
