Demonstrata të mëdha kanë filluar në të gjithë SHBA-në, nga Nju Jorku në San Francisko, si pjesë e protestave të sotme që tashmë po dënohen nga e djathta amerikane si një shprehje e “urrejtjes kundër Amerikës”.
Me sloganin qendror “Jo Mbretër “, miliona amerikanë po demonstrojnë për të denoncuar ushtrimin autoritar të pushtetit nga Donald Trump.
Në zonën Forest Hills të Nju Jorkut, mijëra njerëz u mblodhën që nga mesdita duke brohoritur “e duam vendin tonë, nuk do ta tolerojmë Trumpin”.
“Ky president është një turp dhe shpresoj që miliona njerëz do të dalin në rrugë sot”, tha protestuesja 36-vjeçare Stephanie, e cila preferoi të mos e zbulonte mbiemrin e saj.
Më shumë se 2,700 tubime do të zhvillohen sot në qytetet kryesore të SHBA-së, si dhe në qytezat rurale amerikane… madje edhe pranë rezidencës së Trump në Mar-a-Lago, ku ai kalon fundjavën.
Në mesin e qershorit, dita e parë e demonstratave të organizuara nga organizata ombrellë No Kings, e cila përfaqëson rreth 300 organizata, mblodhi miliona demonstrues të të gjitha moshave.
Zyrtarët e Partisë Republikane denoncuan “mobilizimin e urrejtjes antiamerikane”, ndërsa kryetari i Dhomës së Përfaqësuesve deklaroi: “Vë bast se do të shihni mbështetës të Hamasit dhe antifa-s”. Përfaqësuesi i Minesotës Tom Emer foli për “krahun terrorist të Partisë Demokratike”.
“Mos lejoni që Donald Trump dhe republikanët t’ju frikësojnë dhe t’ju heshtin”, u përgjigj udhëheqësi demokrat i Senatit Chuck Schumer, duke u bërë thirrje amerikanëve që “të bëjnë që zëri i tyre të dëgjohet”.
