Ende pa u hapur shkollat, një mësuese dhe një sanitare e shkollës 9-vjeçare “Naim Frashëri” në Fier, kanë rezultuar pozitive me koronavirus.
Inspektorati i Shëndetit Publik bën me dije se testi i COVID-19 është kryer pas kërkesës së dy grave, pasi ditët e fundit ato kanë pasur simptoma të virusit. Mësohet se mësuesja e sanitarja aktualisht janë karantinuar në banesat e tij.
Nuk dihet ende nëse ditët e fundit mësuesja ka pasur kontakt me nxënësit e saj, duke qenë se mësimi për nxënësit që nuk kanë marrë dot njohuri gjatë periudhës së karantinës, ka nisur prej fillimit të muajit shtator.
Kur ende pa filluar shkolla kemi staf të infektuar në këto institucione arsimore, çfarë pritet të ndodhë në muajit në vijim dhe si do e përballojmë këtë krizë shëndetësore?
Parashikimet e ekspertëve flasin për një valë të dytë të virusit që do jetë më e fortë se e para.
Fëmijët mund të jenë më imunë ndaj virusit, por mund të jenë mbartës dhe transmetues të heshtur të COVID-19 ndaj prindërve, gjyshërve apo stafit të shkollës.
Për më tepër që sistemi shëndetësor shqiptar nuk ofron kushtet më minimale të medikamenteve, apo atë të pajisjeve si aparaturat e kujdesit intensiv, aq të vlefshme për të shpëtuar jetët e pacientëve të intubuar.
Pra me hapjen e shkollave numrat vetëvetiu do të rriten, dhe këtë e dimë nga praktikat ndërkombëtare. Çështja që shtrojmë është nëse jemi të përgatitur t’i përballojmë këto rritje të infektimeve, dhe praktika ka treguar që jo!
/Iconstyle.al
