Gjërat nuk nisën mirë për dy dizajnuesit Laura Kim dhe Fernando Garcia që sollën koleksionin e ri vjeshtë-dimër 2017 të Oscar de la Renta. Një perde nuk u hap gjatë eventit duke penguar gjysmën e audiencës që të mos shihte siç duhej veshjet e mrekullueshme.
Garcia dhe Kim kanë punuar me zotin de la Renta për shumë vite para se ai të ndërronte jetë në vitin 2014. Ata u larguan kur Peter Copping u bë drejtor kreativ dhe më pas nisën të korrnin sukses me markën e tyre, Monse.
Pas largimit të papritur të Copping korrikun e kaluar, ata u rikthyen në kompani dhe pas një pune të palodhshme prezantuan koleksionin e vjeshtës për Monse dhe Oscar de la Renta në të njëjtin vend.
Ata sollën një frymë rinore për markën Oscar de la Renta, me ngjyra të ndezura dhe ndërthurjen e klasikes dhe modernes. Dizajnet me vija diagonale dhe fundet me pelush janë veshjet që do të mbizotërojnë në tapetin e kuq të çdo eventi në vijim.
Një nga modelet e preferuara të pasarelave të Javës së Modës në New York, ishte Bella Hadid, e cila mbylli shfaqjen me një fustan të zi elegant velvet, me një kontur të qëndisur me kristale në anën e djathtë.
Me flokët e lidhura bisht, bukuroshja brune u shfaq me një palë vathë argjendi dhe diamanti me një gjatësi të konsiderueshme që për pak preknin shpatullat e saj. Detaji i veçantë ishte makijazhi me penelin me tonin shumë ngjyrësh që make-up artisti kishte bërë në sytë e saj bojëqielli.
*Shfleto galerinë
