Protesta e sotme e opozitës u shoqërua me përplasje meefektivët e policisë, hedhje të shashkave e tymueseve dhe me gaz lotsjellës.
Protesta nisi rreth orës 18:00, ndërsa situata u agravua pas fjalimit të Lulzim Bashës rreth orës 19:00.
Fillimisht protestuesit të vendosur para Kryeministrisë arritën të çanin kordonin e policisë, duke u ngjitur në ambientet e jashtme të institucionit. Pjesë e protestës u bënë edhe fermerët, që janë kundër rritjes së çmimit të TVSH-së, si dhe artistët që dalin prej kohësh kundër prishjes së Teatrit Kombëtar.
Më pas protestuesit u drejtuan te Parlamenti, ku pati tensione dhe përplasje me policinë, ku u përdor edhe gazi lotsjellës për shpërndarjen e protestuesve.
Efektivët u detyruan që të hidhnin disa herë gaz lotsjellës, pasi turma e protestuesve rikthehej në zonën para Parlamentit.
Një nga incidentet e tjera të shënuara ishte djegia e makinës së një qytetari, të cilit iu bë e pamundur vazhdimi i lëvizjes. Protesta u mbyll sonte rreth orës 22:00.
Burimi: BalkanWeb
