Varianti Omicron. i cili u zbulua në Afrikën e Jugut, deri më tani ka shkaktuar një numër të madh infektimesh në vende të ndryshme dhe dje u identifikua viktima e parë nga ky variant në Britaninë e Madhe.
Sot, Organizata Botërore e Shëndetësisë deklaroi se varianti i ri i COVID-19, Omicron, është më i transmetueshëm se varianti i mëparshëm Delta dhe zvogëlon akoma më shumë efikasitetin e vaksinës.
OBSH gjithashtu ka informuar se varianti ka më pak gjasa të shkaktojë simptoma serioze.
OBSH ka thënë se nuk është konstatuar ende arsyeja e shkallës kaq të lartë të transmetimit. Ende nuk është plotësisht e qartë nëse faktori që po kontribuon në përhapjen kaq të shpejtë të këtij varianti lidhet me tendencën e tij për t’iu shmangur përgjigjes imunitare apo lidhet me transmetueshmërinë e tij të lartë.
Ndërkohë, OBSH ka vënë në dukje gjithashtu se deri më 9 dhjetor janë evidentuar raste të variantit Omicron në 63 vende.
Sipas të dhënave të OBSH-së, varianti Omicron deri më tani ka shkaktuar raste më të lehta ose asimptomatike, megjithatë, ende nuk dihet me siguri rreziku i këtij varianti.
“Mbetet e paqartë se deri në çfarë mase Omicron mund të jetë më pak virulent. Duhen më shumë të dhëna për të kuptuar profilin e rrezikshmërisë”, shtoi OBSH.
Më herët, më 26 nëntor 2021, Organizata Botërore e Shëndetësisë e identifikoi variantin si një variant shqetësues (VOC) duke u bazuar të këshillat e Grupit Këshillimor Teknik të organizatës për Evolucionin e Virusit.
U tha gjithashtu se varianti ishte shumë i ndryshëm nga virusi fillestar, me një numër të madh mutacionesh, duke përfshirë 26-32 të tilla në proteinën spike, gjë e cila thuhej se ishte shqetësuese, si dhe u deklarua se varianti i ri kishte potencialin e shmangies nga imuniteti dhe transmetueshmëri më të lartë.
