Organizata Botërore e Shëndetësisë (OBSH) ka deklaruar se shpërthimi i hantavirusit në bordin e anijes turistike holandeze “MV Hondius” nuk përbën fillimin e një pandemie globale, duke theksuar se virusi përhapet ndryshe nga Covid-19.
Epidemiologia e OBSH-së, Maria van Kerkhove, tha gjatë një konference për media se hantavirusi transmetohet përmes “kontaktit të ngushtë dhe intim” dhe nuk ka të njëjtin potencial përhapjeje si koronavirusi.
Sipas OBSH-së, deri tani janë konfirmuar pesë raste nga tetë të dyshuara, ndërsa tre persona kanë humbur jetën. Mes viktimave është një grua holandeze 69-vjeçare e infektuar me virusin. Ndërkohë, vdekja e bashkëshortit të saj dhe e një gruaje gjermane po hetohen ende.
Autoritetet shëndetësore ndërkombëtare po gjurmojnë dhjetëra pasagjerë që kanë zbritur nga anija gjatë ndalesës në ishullin Shën Helena më 24 prill.
OBSH bëri të ditur se për herë të parë është dokumentuar transmetimi i hantavirusit nga njeriu te njeriu, pasi zakonisht virusi përhapet nga brejtësit.
Anija luksoze, e operuar nga kompania Oceanwide Expeditions, kishte nisur udhëtimin më 1 prill nga Ushuaia në Argjentinë dhe pritet të mbërrijë në Ishujt Kanarie të Spanjës. Në bord ndodheshin rreth 150 pasagjerë dhe anëtarë ekuipazhi nga 28 vende të ndryshme.
OBSH ka kërkuar mbajtjen e maskave në bord dhe përdorimin e pajisjeve të avancuara mbrojtëse nga personeli që kujdeset për rastet e dyshuara.
Drejtori i përgjithshëm i OBSH-së, Tedros Adhanom Ghebreyesus, deklaroi se rreziku për shëndetin publik mbetet “i ulët”, megjithëse paralajmëroi se mund të shfaqen raste të tjera për shkak të periudhës së gjatë të inkubacionit, e cila mund të zgjasë deri në gjashtë javë.
Ndërkohë, disa shtete, përfshirë Britaninë e Madhe, SHBA-të dhe Singaporin, kanë nisur monitorimin dhe izolimin e pasagjerëve që kanë udhëtuar me anijen.
Autoritetet argjentinase kanë njoftuar gjithashtu se do të kryejnë testime te brejtësit në Ushuaia për të hetuar burimin e mundshëm të infeksionit.
