Virusi vdekjeprurës Covid-19 i cili ka përhapur panik në mbarë botën, po rrit çdo ditë e më shumë shifrat e të infektuarve dhe jetëve të humbura.
Italia ka arritur një shifër akoma më të lartë se Kina dhe është kthyer në vendin më të prekur të Europës, ku brenda 24 orëve të fundit u regjistruan 602 viktima.
Situata në të gjithë botën është përkeqësuar ndjeshëm, ndërsa kreu i OBSH-së, Tedros Adhanom Ghebreyesus u shpreh se brenda 4 ditëve janë regjistruar 300.000 të prekur.
Nëse 100 mijë të infektuar u regjistruan për dy muaj, tashmë e njëjta shifër të prekurish është regjistruar për 10 ditë, duke e çuar numin në 200 mijë e më pas situata u rëndua akoma më shumë pasi për 4 ditë shifra totale shkoi në 300 mijë të prekur.
Kështu, kreu i OBSH-së u shpreh se situata po vjen duke u përkeqësuar, ndaj ka bërë thirrje për armëpushim mbarëbotëror.
“Furia e Coronavirusit tregon çmendurinë e luftës. Kjo është arsyeja pse kërkojmë një armëpushim global dhe të menjëhershëm në të gjithë cepat e botës. Është koha për të ndaluar konfliktet e armatosura dhe të përqendrohemi në luftën e vërtetë të jetëve tona. Palëve në luftë iu them: tërhiquni nga armiqësitë”.
Deri tani, në vendin tonë janë regjistruar 104 raste të infektuara me Covid-19, ndërsa janë shënuar edhe 4 jetë të humbura.
