Pandemia e koronavirusit ka lënë pa punë 57 mijë persona, deri në fund të korrikut, (9% të të punësuarve në vend) dhe 73% e humbjeve të vendeve të punës kanë ardhur nga subjektet e vogla.
Bizneset e vogla janë ndër më të prekurat nga kriza ekonomike pas mbylljes nga COVID-19, dhe askush nuk po bën asgjë për këtë sektor. Monitor.al raporton se mbi 32,4 mijë biznese në vend janë mbyllur dhe 98% e tyre janë subjekte të vogla.
Korriku nxori në pah pasojat reale nga izolimi gati tremujor i këtyre bizneseve dhe faktin që paketat mbështetëse të qeverisë, nuk kanë mjaftuar që mijëra biznese të mbijetojnë në treg.
“Rreth 65 mijë të punësuar nga bizneset e vogla, aktiviteti i të cilëve u mbyll me urdhër të Ministrisë së Shëndetësisë përfituan nga paketa e parë, me 26 mijë lekë në muaj për tre muaj. Pjesa tjetër përfituan nga paketa e dytë, me një pagesë 40 mijë lekë vetëm një herë. Por, sapo ka ardhur korriku, shumë biznese kanë nxituar të çregjistrohen dhe të largojnë punonjësit nga puna”, raporton Monitor.
Gjoba selektive për lokale dasmash
Me aktin normativ, sipas të cilit nuk lejohet puna në lokalet e natës, ato me muzikë live apo lokale dasmash, është abuzuar tej mase dhe çdo ditë e më shumë po dëshmojmë pabarazi në mesin e bizneseve.
Gjobat selektive të vendosura për organizimin e dasmave në periudhë pandemie, kanë ngritur në këmbë pronarët e lokaleve në Sukth të Durrësit. Janë 12 biznese në këtë zonë pronarët e të cilave i nxjerrin të ardhurat duke organizuar dasma, por ata shprehen se janë penalizuar nga qeveria dhe se klientët e tyre po shkojnë të bëjnë dasma në Tiranë, e vende të tjera, aty ku nuk gjobiten pronarët e lokaleve.
Ata deklarojnë se ndjehen të diferencuar nga kolegët dhe se në qendër të Durrësit nuk janë lejuar që të organizojnë dasmë, ndërsa klientët e tyre po ju ikin në lokalet e tjera jashtë Sukthit, ku nuk ka pasur ndëshkime me gjobë. Kërkesa e tyre është krijimi i një protokolli nga Ministria e Shëndetësisë ku të përcaktohen detyrimet e tyre dhe të lejohen të punojnë.
Gjoba selektive për muzikën pas orës 20:00
Aksioni i gjobave për muzikën pas orës 20:00 është shtrirë nga Tirana në Durrës, ndërsa sa i përket jugut, autoritetet duket sikur bizneseve atje u kanë lënë dorë të lirë.
“Iconstyle.al” ka raportuar gjithmonë me pamje rastet kur resorte të mëdha vijojnë të pashqetësuar muzikën pas mesnate nën hundën policisë, si rasti te Mali i Robit i pak ditëve më parë (shiko këtu).
Javën e kaluar ne publikuam pamjet kur një patrullë policie shkonte shumë pranë resortit rreth orës 2:00, i binte njëherë sirenës sa për paralajmërim dhe largohej ndërkohë që muzika vijonte pavarësisht ankesave të banorëve atje dhe orës së vonë.
Ministri Sandër Lleshaj bashkë me profesionistët e PR-it në Policinë e Shtetit, po reklamojnë me zë të lartë çdo ditë rastet e gjobitjes së bizneseve familjare në hall në kushte krizë, ndërkohë kur është fjala për të mëdhenjtë, policia bëhet e verbër ndaj abuzimeve.
https://www.instagram.com/p/CESM-ggg7xW/?utm_source=ig_embed
Lokalet e baret më të prekurit! Po mbyllen vitrinat e qyteteve!
Në raport me popullsinë, në 2018-n Shqipëria kishte 654 bar-kafe për 100 mijë banorë, sipas përllogaritjeve të “Monitor”, ose 1 bar kafe për 152 banorë. Ne u renditëm të parët në botë për numrin e tyre, madje ia kaluam edhe Spanjës, e cila mbante rekordin në Bashkimin Europian dhe në botë për numrin e lartë të bar-kafeve për banorë, me 592 bar kafe për 100 mijë banorë. Por pas pandemisë, duket se kjo situatë ka ndryshuar.
Në një komunikim për “iconstyle.al”, kryetari i Shoqatës së Lokaleve dhe Restoranteve, Enri Jahaj bëri me dije se, çdo ditë po mbyllen bizneset e vogla familjare, të cilët janë edhe më të prekurit pas mbylljes së detyrueshme që nga muaji mars deri në maj. Sipas burimeve për “iconstyle.al”, 3 deri në 5 lokale e bare në ditë po mbyllen dhe situata pritet të përshkallëzohet pasi kjo është vetëm vala e parë. Shumë biznese po konsiderojnë mbylljen, pasi ju kërkohet qira e plotë, në të kundërt duhet të ndërpresin kontratën dhe të lirojnë ambientin.
Si mund të ndihmojë qeveria këtë sektor?
Enri Jahaj propozon që të bëhet një pagesë prej të paktën 50 % për të gjithë kategorinë që janë mbyllur, nga Disko-t e lokalet e muzikës te restorantet etj. Gjithashtu kërkohet ulja e TVSH-së dhe heqja e hapësirës publike deri sa të mbaroje kjo gjendje:
“Reduktim i TVSH-së në masën e hotelerisë pra 6 %, është një ndër kërkesat, pasi kjo do i jepte një shtysë sektorit dhe nuk do kishim pse të rrisnim çmimet; shtyrjen e te gjitha llojeve te taksave deri ne mars 2021; Fillimin e dhënieve të kredive të buta për kapital qarkullues pasi deri tani nuk kanë filluar ende dhe hartimin e një plani strategjik për rimëkëmbjen e sektorit”.
Mënyra ka plot për të kontribuuar në këtë moment krize për të gjithë bizneset në vështirësi, që nga rimbursimi i pagave të punonjësve apo te paketat ndihmëse që do të ishin një stimulim i mirë në këtë periudhë.
/Iconstyle.al
