Para disa ditësh Adriana Matoshi deklaroi se kishte vendosur t’i futej politikës. Ajo është përfshirë në listën e kandidatëve për deputet të Partisë Vetëvendosje.
Në një intervistë të dhënë për mediat në Kosovë ajo ka treguar se nuk e ka pasur kurrë këtë si synim në jetë. Megjithatë ajo është shprehur se kandidimi si deputete erdhi si rezultat i zhgënjimit si qytetar i thjeshtë, si nënë e gjithashtu edhe si artiste.
Sot lideri i VV-së, Albin Kurti ka njoftuar se aktorja është anëtarësuar në partinë e tij. Lajmin ai e ka bërë të ditur me anë të një postimi në Facebook, të cilin e ka nisur me “O sa mirë”. Ai ka thënë se Matoshi sipas tij është ndër aktoret më të mira shqiptare dhe njëkohësisht më të kërkuarat.
Postimi i plotë:
O sa mirë!
Adriana Matoshi u anëtarësua mbrëmë në VETËVENDOSJE!. Adriana është një ndër aktoret më të mira shqiptare dhe ndër më të kërkuarat në zejen e filmit në vend. Ajo ka përfunduar studimet në Universitetin e Prishtinës, Fakultetin e Arteve, në klasën e Profesor Faruk Begollit. Disa nga çmimet e shumta kombëtare e ndërkombëtare që ka fituar janë: çmimi “aktorja më e mirë” për rolin e saj në filmin “Kthimi” të regjisores Blerta Zeqiri, në Brazil, Valencia të Spanjës si dhe në Paris, çmimi “aktorja më e mirë” për rolin e saj në filmin “Zana” në Berlin, dhe në Neë Jork është shpërblyer edhe për rolin e saj në filmin “T’padashtun”. Përkundër roleve të saj në film, ajo ka luajtur edhe në shumë shfaqje teatrale si “Mësimi”, “Kumbara”, “Dejzilend”, “Shtëpia e Berndarda Albës”, “Këmisha e gjakut”, “Tudje srce”, “Romeo and Juliet”, etj. Adriana është anëtare e Akademisë Evropiane të Filmit, dhe ka qenë drejtoreshë e Teatrit të Gjilanit në vitin 2007 dhe po ashtu edhe kryetare e bordit drejtues të këtij teatri. Ajo ka luajtur shumë role gjatë karrierës së saj, mirëpo roli më i rëndësishëm vazhdon të jetë ai i gruas aktiviste. Adriana Matoshi është në mesin e 41 grave në listën tonë të referendumit për deputete të ardhshme në Kuvendin e Republikës së Kosovës.
