60 nxënës nga Kosova erdhën në Shqipëri për të vazhduar arsimin e mesëm në gjimnazet në Tiranë, Korçë, Shkodër dhe Berat. Kjo nismë është ndërmarrë nga Ministria e Arsimit, si pjesë e programit të përbashkët të shkëmbimit të nxënësve.
“Dje erdhën në Shqipëri 60 nxënësit e parë nga Kosova, të cilët do të marrin pjesë në programin e përbashkët të shkëmbimit të nxënësve mes dy vendeve. Ata do të vendosen në 60 familje në Tiranë, Korçë, Shkodër dhe Berat dhe do të vijojnë mësimin në gjimnazet tona”, shkruan Shahini në një status në Facebook.
Ajo sqaron më tej se gjithashtu edhe nxënësit shqiptarë pritet të nisen drejt Kosovës, për të njëjtën gjë:
“Përveçse do të mësojnë bashkë, nxënësit do të kenë një agjendë të ngjeshur me ekskursione, vizita në muze dhe aktivitete të ndryshme kulturore”.
Në këtë mënyrë Shahini u shpreh se nxënësit e të dy vendeve mund të mësojnë më shumë rreth njëri-tjetrit.
“Nuk ka mënyrë më të mirë për t’u njohur me njëri-tjetrin dhe për të ndërtuar miqësi mes të rinjve të Kosovës dhe Shqipërisë që i qëndrojnë distancave dhe kohës”, përfundon statusi i saj.
