Ditën e sotme, 30 nxënës të gjimnazit “Janaq Kilica” në Fier janë helmuar sërish, duke u dërguar me urgjencë në spital.
Sipas njoftimit paraprak të policisë, pista e parë e hetimit lidhet me përdorimin e një sprajti piperi, megjithatë ende nuk kemi një konfirmim zyrtar të shkakut të helmimit.
Për “News24”, njëri prej nxënësve ka treguar për situatën në shkollën “Janaq Kilica” duke habitur me deklaratën e tij.
Ervis Kuçi shprehet se nxënësit ishin njoftuar për një alarm fals, për një stërvitje që do të tregonte si do të reagonin ata në raste emergjente.
“Ishim në pushim të gjatë, erdhëm në oborr kur sapo hymë në shkollë i pamë të tjerët që të dilnin të shqetësuar. Na thanë që është alarm fals, nuk na lanë të hyjmë brenda, na thanë që ishte një stërvitje se si do reagonim ne në raste emergjente. Nxënësit janë të traumatizuar si të shokuar. Kjo u hap nga nxënësit, edhe mësuesit ishin të shpërndarë për t’ju ardhur në ndihmë nxënësve me më shumë probleme”.- ka treguar ai.
Një javë më parë, 6 nxënës të kësaj shkolle u helmuan gjatë orës së mësimit, për shkak të një reaksioni kimik në laboratorin e kimisë.
