Pavarësisht se numri zyrtar i të infektuarve është 42, mjeku infeksionist Pëllumb Pipero ka ngritur alarmin duke thënë se numri minimal i përsonave të prekur mund të shkojë në 400.
Në një intervistë me “ABC News” mjeku theksoi se kjo sëmundje ka shumë të panjohura, por pavarësisht kësaj janë marra masat për ta pasur në qendër të vëmendjes.
“Kjo sëmundje ka pasur shumë të panjohura. Rastet e para ashtu si në botë, vijnë pa lajmëruar dhe duke mos pasur ansjë informacion, ne ekspozohemi edhe sepse epidemia ka qenë në qendër të vëmendjes tonë. As ne nuk i shpëtuam dot kësaj ndodhie, ne jemi të ekspozuarit e parë jemi heronjtë e parë shpesh edhe dëshmorët e parë. Sa i takon dy mjekëve të konfirmuar pozitiv, gjëndja shëndetësoire e tyre është e mirë. Janë të vetëizoluar”, u shpreh Pipero.
Mjeku më pas ngriti alarmin me rastet e fshehura të sëmundjes dhe theksoi se mbas çdo rasti të konfirmuar fshihen 10 ose 15 raste të tjera minimumi:
“Ne njohim raste që u është bërë analiza ose kanë pasur ankesa mjekësore. Në kushtet që jemi numri minimal i personave të prekur duhet të jetë së paku mbi 400”, u shpreh mjeku Infeksionist.
Sa u përket rasteve ku njerëzit fshehin historinë e udhëtimit, Pipero dha një mesazh duke u shprehur se të gjithë qytetarët veçanërisht ata që kanë udhëtuar dhe kanë kontakte të afërta me rrethin e ngushtë të personave të prekur, t’i drejtohen 127 dhe jo spitalit.
“Duke na ekspozuar ne, do e kemi të pamundur t’i japim shërbim atyre që kanë nevojë më shumë se kurrë. Të gjithë personat që kanë pasur kontakt dhe kanë dyshime, të vetëkarantinohen sa më shpejt të jetë e mundur pasi është e vetmja mënyrë për ta parandaluar epideminë”, tha Pipero.
Gjithashtu ai tha se pavarësisht të panjohurave që ka, ky virus është lehtësisht i shkatërrueshëm, “me ujë dhe sapun”.
