Qytetarët janë mbledhur këtë të hënë para Kryeministrisë në ditën e gjashtë të protestës për t’i kërkuar kreut të Qeverisë të marrë masat e nevojshme për të ulur çmimin e karburantit dhe produkteve bazë të shportës.
Njerëzit kanë ardhur nga qytete të ndryshme të Shqipërisë. Ata mbajnë pankarta në duar dhe kërkojnë uljen e çmimeve.
Paketa e Rezistencës Sociale e miratuar nga qeveria nuk është masa e duhur sipas protestuesve, pasi është anashkaluar pjesa tjetër e popullsisë.
Kjo revoltë e qytetarëve erdhi pas rritjes së menjëhershme të çmimit të produkteve ushqimore dhe hidrokarbureve si efekt i luftës në Ukrainë.
Dy ditë më parë, Bordi Kombëtar i Menaxhimit të Hidrokarbureve vendosi që çmimi i naftës të shkonte 217 lekë për litër.
Kujtojmë se revolta e qytetarëve erdhi pas mëngjesit të 7 marsit, atëherë kur çmimet e produkteve të ndryshme, në supermarkete, apo shërbime të tjera, si transporti rrugor, pësuan një rritje drastike.
Çmimi i naftës, brenda 24 orëve, u kushtoi atyre 30-35 lekë më shumë se një ditë më parë.
Nga ana tjetër, aktivistët, nëpërmjet kanaleve online, iniciuan grumbullimet e para.
Protestat u shtrinë në akset kryesore të Tiranës, duke i bllokuar ato. Të nesërmen, strukturat policore, në bazë të provave të grumbulluara, kryen arrestime për vepra të ndryshme penale.
