Izolim, emri që ndryshoi jetën e miliarda njerëzve në mbarë botën në 2020-ën, është caktuar si fjala e vitit nga fjalori Collins. Sipas këtij fjalori, izolimi definohet si “vendosje e kufizimeve të rrepta në udhëtime, ndërveprim shoqëror dhe qasje në hapësira publike” dhe përdorimi i tij ka pasur një “boom” gjatë këtij viti.
Nga materialet e mbledhura nga gazetat, websitet, librat, radiot, televizionet, u regjistrua një rritje me 6.000% në përdorimin e kësaj fjalë. Leksikografët kanë regjistruar më shumë se 250,000 përdorime të fjalës “izolim” më 2020, për dallim nga vetëm 4,000 një vit më parë.
“Gjuha është një pasqyrim i botës përreth nesh dhe 2020-ta është dominuar nga pandemia globale“, thotë konsulentja e përmbajtjes së gjuhës Collins Helen Newstead. “Ne kemi zgjedhur izolimin si fjalën e vitit, sepse përmbledh përvojën e përbashkët të miliarda njerëzve të cilëve u është dashur të kufizojnë jetën e tyre të përditshme në mënyrë që të parandalojnë përhapjen e virusit. Izolimi ka ndikuar në mënyrën se si ne punojmë, studiojmë, shkojmë dyqane dhe shoqërohemi”, është shprehur konsulentja.
Për koronavirusin e ri është raportuar fillimisht në fund të vitit 2019-të në Wuhan të Kinës. Sipas të dhënave të Universitetit Johns Hopkins, autoritetet në gjithë botën kanë regjistruar mbi 50 milionë persona të infektuar me këtë virus. Fatkeqësisht nga të infektuarit, deri më tani mbi 1.2 milionë njerëz kanë humbur jetën.
