Çdo javë në rubrikën “Pyet Psikologen” do të postohet një letër e dërguar nga lexuesit e iconstyle.al. Nëse keni ndonjë shqetësim në jetën personale, familjare apo profesionale, na shkruani dhe psikologia e redaksisë sonë do t’iu përgjigjet, duke respektuar të gjitha të drejtat tuaja të privatësisë.
Jam një 26-vjeçare beqare, nuk kam patur asnjëherë ndonjë lidhje. Para pak muajsh më propozoi një djalë, të them të drejtën më pëlqeu si fillim. Mirëpo nuk e di si do t’ia bëj, sepse ai kërkon të dalim dhe unë jam e pavendosur në këtë pjesë. Për këtë më pengon fakti se jam rritur në një vend ku paragjykohesh në qoftë se del me dikë pa ta ditur prindërit. Më ndihmoni të marr një vendim.
Përshëndetje e dashur lexuese!
Vendimi për të dalë ose jo në një takim me një djalë të takon ty. Meqë thua se nuk ke dalë asnjëherë me një djalë deri më sot, atëherë për ty kjo do të jetë një eksperiencë e re dhe si çdo gjë e re, mbart pasiguri dhe ankth. Këto janë emocione të natyrshme që i ndodhin kujtdo kur provon diçka që nuk e ka bërë më parë. Mirëpo, është një eksperiencë që herët e vonë do të provohet, do të përjetohet.
Thua se ai të pëlqen, por të pengon mendimi i prindërve. Rruga mund të ketë gjithmonë pengesa. Do të duhet të përballesh me to. Vetëm në sajë të përballimit të këtyre pengesave për të provuar gjëra të reja e për të arritur gjërat që dëshiron, do të mund të kuptosh çfarë do. Të inkurajoj të dalësh, duke ruajtur ekuilibrin mes dëshirave të tua dhe të të tjerëve. Je në moshë madhore, në një moshë kur duhet të mbash përgjegjësi për veprimet e tua dhe të guxosh për të shkuar në terrene të pashkelura, për të njohur dhe zhvilluar veten.
Nëse i referohem teorisë së stadeve të zhvillimit të psikologut gjermano-amerikan, Erik Erikson, ti je në stadin “Intimiteti kundrejt izolimit”. Detyra madhore e këtij stadi (18-35 vjeç) është të krijosh një lidhje intime të qëndrueshme, me një partner të rritur, për të plotësuar nevojat biologjike, psikologjike dhe sociale. Në të kundërt, mund të rrëshqasësh ngadalë dhe pa e kuptuar drejt “ishullit të izolimit”.
Shpresoj të të kem orientuar sadopak! Zgjedhja të takon ty!
*Lediona Braho, psikologe klinike
Për Iconstyle.al
