Këtë të premte janë identifikuar plot 77 raste pozitive me COVID-19 në 24 orët e fundit, nga 78 që u shënuan dje.
Ndërkohë që pritet përditësimi i ministrisë, burime për Top Channel bëjnë me dije se sot nuk ka ulje të numrit të të infektuarve ditorë.
Dje u bë me dije se në spitalin Infektiv po trajtohen 76 pacientë, 14 prej tyre janë në terapi intensive, ndërsa 2 janë të intubuar.
Ministria e Shëndetësisë apelon që çdo qytetar të tregojë kujdes me ruajtjen e higjienës personale, me mbajtjen e distancës fizike, vendosjen e maskës në ambiente publike.
“Ruani distancën fizike në ambientet publike. Kudo kur kjo nuk është e mundur, vendosni maskë apo barrierë mbrojtëse. Bizneset të sigurojnë vazhdimisht elementët e higjienës si sapun, letër për pastrimin e duarve, dezinfektantë. Siguroni ajrosjen e mire, pastrimin dhe desinfektimin e ambjenteve të punës. Përdorni maskat apo barrierat mbrojtëse gjatë kohës që u shërbeni qytetarëve. Task forca anti-covid nuk do të tolerojë shkelje të rregullave të sigurisë duke e konsideruar rrezik për shëndetin e qytetarëve. Mininistria e Shëndetësisë dhe Mbrojtjes Sociale i drejtohet qytetarëve të shmangin vendet me grumbullime, pasi janë burim për përhapjen e infeksionit”, ishte thirrja e ministrisë dje.
Dje u shënua viktima e 49 nga koronavirusi në vend, pasi një pacient ndërroi jetë në Spitalin Infektiv.
Ministria e Shëndetësisë ka bërë me dije se pacienti 66-vjeçar vuante nga diabeti dhe hipertensioni, gjë që ka sjellë komplikime të mëtejshme në gjendjen e tij shëndetësore.
“Që nga fillimi i epidemisë, 49 qytetarë e kanë humbur betejën me COVID-19, ndërsa vijon të ketë raste të rënda që po trajtohen në shërbimin infektiv. Ministria e Shëndetësisë dhe Mbrojtjes Sociale apelon qytetarët të tregojnë kujdes në zbatimin e rregullave në përditshmëri dhe bizneset të respektojnë me rigorozitet protokollet e sigurisë, për të ruajtur shëndetin e qytetarëve. Inspektoriati Shtetëror Shëndetësor dhe Task-Forca anti-COVID vijojnë të jenë në terren 24/7 për monitorimin dhe kontrollin e zbatimit të protokolleve të sigurisë”, njofton ministria.
/Iconstyle.al
