Pas Italisë, Spanja është shteti që po përballet me vështirësinë më të madhe për shkak të koronavirusit.
Numri i të prekurve ka shkuar në 33,089 persona dhe fatkeqësisht është rritur ndjeshëm edhe numri i viktimave.
Në 24 orët e fundit mësohet se kanë ndërruar jetë 434 persona dhe në total bilanci është tragjik me 2, 206 viktima.
Po aq tragjike janë edhe pamjet që vijë nga spitalet në Spanjë.
Së fundmi në internet është publikuar një video e trishtë nga një spital, ku shihet se për të infektuarit me COVID-19 nuk ka më as shtretër.
Numri është shumë i lartë dhe kapaciteti i spitaleve nuk u mundëson dot që të paktën ata të kenë një vend për të fjetur.
Një numër i madh të infektuarish qëndrojnë të shtrirë përtokë dhe presin që mjekët t’u japin mjekim dhe t’i ndihmojnë.
Disa që kanë më shumë simptoma, janë të shoqëruar nga mjekët, ndërsa në shtretër janë vendosur ata në gjendje më të rëndë shëndetësore.
Autoritetet spanjolle kanë treguar se videoja është realizuar mbrëmjen e 20 marsit, ditën kur ishte piku i të infektuarve dhe situata u kishte dalë nga kontrolli.
Ata gjithashtu bënë të ditur se situata tashmë është zgjidhur me krijimin e hapësirave shtesë brenda ambienteve të spitalit, për të shtruar personat e prekur nga Covid-19.
