Autoriteti i Mediave Audiovizive kishte paralajmëruar prej disa ditësh, se 10 shtatori do të ishte dita përfundimtare e mbylljes së transmetimeve analoge në qarkun Tiranë dhe qarkun Durrës. Dhe ashtu ndodhi!
Por çfarë duhet të bëjmë, për të parë sërish kanalet televizive?
Tanimë të gjithë teleshikuesit që ndjekin transmetime televizive përmes teknologjisë analoge, duhet të pajisen me dekoder dixhital tokësor të tipit DVB-T2- Universal ose të jenë të pajisur me aparat televizori që ka të inkorporuar dekoderin e këtij tipi.
Ndërkohë që sipas përcaktimeve ligjore që ka bërë AMA, fikja e transmetimeve analoge nga televizionet kombëtare apo ato lokale e rajonale është shoqëruar dhe me mbylljen e transmetimeve digjitale të palicencuara, si dhe është zgjidhur çështja e renditjes së kanaleve.
AMA njofton qytetarët e Tiranës dhe Durrësit, se jo vetëm që do të jenë ndjekës të transmetimit më cilësor të sinjalit, por dhe me ofertë të shtuar të kanaleve programore.
Prej përfundimit të këtij procesi, qytetarët do të ndjekin 34 kanale pa pagesë nga paketat programore publike dhe private që janë në transmetim.
