Një ngjarje tragjike ka tronditur botën e sporteve ajrore, pasi Pierre Wolnik, dy herë kampioni botëror francez i rënies së lirë, humbi jetën gjatë një hedhjeje në masivin e Mont Blanc. Sipas raportimeve të mediave italiane, aksidenti ndodhi të shtunën, kur sportisti 37-vjeçar u hodh nga një helikopter për një fluturim me kostum me krahë një disiplinë ekstreme që kërkon përgatitje dhe saktësi maksimale.
Gjatë zbritjes, parashuta e Wolnikut nuk u hap siç ishte planifikuar, duke bërë që situata të përfundonte në mënyrë fatale. Sportisti u rrëzua në zonën e Bossons, në Haute-Savoie, një rajon alpin i njohur për terrenin e tij të vështirë dhe për sfidat që paraqet për sportet ekstreme.
Ekipet e shpëtimit mbërritën menjëherë në vendngjarje pas alarmit, por pavarësisht reagimit të shpejtë, nuk ishte e mundur t’i jepej ndihmë. Trupi i tij u lokalizua më vonë dhe u transportua me helikopter, ndërsa autoritetet nisën procedurat për zbardhjen e plotë të rrethanave të aksidentit.
Pierre Wolnik konsiderohej një nga figurat më të spikatura të parashutizmit francez. Si pjesë e ekipit kombëtar, ai kishte ndërtuar një karrierë të respektuar në arenën ndërkombëtare dhe ishte planifikuar të merrte pjesë në Kampionatin Botëror 2026 këtë verë një objektiv për të cilin, sipas miqve dhe bashkëpunëtorëve, po përgatitej intensivisht.
Lajmi për ndarjen e tij nga jeta u konfirmua në rrjetet sociale nga Yves-Marie Guillaud, president i Federatës Franceze të Parashutizmit. Në mesazhin e tij, ai e përshkroi Wolnikun si “një të ri jashtëzakonisht të talentuar, me një buzëqeshje miqësore” dhe si “një parashutist të rrallë”, duke theksuar kontributin dhe pasionin që ai solli në sport.
