Përfaqësuesja e Sindikatës së Mësuesve, Pranvera Janku ka folur sot në emër të stafit pedagogjik të shkollës në Babrru, për ngjarjen e rëndë të përdhunimit të 15-vjeçares, e cila tronditi gjithë opinionin publik.
Janku shprehet në një intervistë FaxWeb.al, se asnjë nga mësuesit nuk ishte në dijeni të sjelljes së Abaz Dokës, i cili përdhunoi për 3 vite rresht minorenen dhe e shantazhonte me video.
Sipas saj, ngjarja është mbajtur totalisht e fshehtë dhe të vetmit që mund ta kenë ditur kanë qenë miqtë e 15-vjeçares, ndërsa për syrin e mësuesve, Doka ishte një njeri që sillej korrekt.
“Asnjë nuk do që të ndodhë një ngjarje e tillë. Kjo është marrë vesh nga mediet, ne nuk kishim djeni. Nuk është puna se kjo ra në sy brenda ambienteve të shkollës, nuk ndodhi këtu brenda. Këtu bëhet një punë e shkëlqyer. Këto janë raste shumë të mprehta sociale, ne na duket shumë e padrejtë që të merresh me jetën private të dikujt, kur ti nuk je në dijeni. Drejtori nuk e ka ditur këtë rast. Drejtori thirri psikologen, këshillin drejtues, bëri lëvizje, por nga ana tjetër filluan edhe mediet. Unë drejtorin e njoh për njeri të rregullt. Ky person i cili ka punuar kaq fshehtas, sillej mirë në shkollë. Ai hapte derën, nuk kam parë ndonjë gjë këtu brenda shkollës. Për pjesën e vajzës unë nuk di të flas shumë, nuk kam të dhëna të sakta për këtë. Duhet të themi se në këto raste askush nuk flet, ndoshta shoqëria e ngushtë mund ta dinte, por nuk janë shprehur”, është shprehur ajo.
Por në një intervistë ekskluzive për “iconstyle.al”, një ish-nxënëse e shkollës në Babrru tregoi se kishte folur me mësuesen kujdestare për sjelljen prej maniaku të Dokës, i cili i kishte ngacmuar vajzat me fjalë të pista e i kishte kërcënuar se nëse nuk do të shkonin me të, do t’u thoshte prindërve që kishin lënë orët e mësimit (lexo këtu).
“Ai vjen në klasë dhe na thotë “Sa të mira që jeni” afrohet dhe na kërcënon se po nuk shkuam me të do tu tregonte prindërve tanë se kishim lënë orët e mësimit gjë që nuk kishte ndodhur. Ashtu siç ishim shkuam te mësuesja kujdestare për t’i treguar rastin e këtij edhe ajo na thotë: ‘ju lutem shumë dilni jashtë edhe mos flisni budallalliqe me’”.
Një tjetër vajzë tregoi për “icontyle.al” se nuk u tregoi mësuesve pasi me siguri ata nuk do ta besonin!
