Është cilësuar si një ndër serialet më shokues të Netflix dhe jo për realizimin, por për përmbajtjen që përcjell dhe historinë e prostitucionit të dy vajzave të reja, nxënëse gjimnasi.
Sot do të flasim pikërisht për rininë e sotme, atë rini të fiksuar për të dalë bukur në Instagram dhe në sytë e botës, si një mburojë për të fshehur ato gjërat e trishta që ndodhin pas një ekrani telefoni.
“Baby” është seriali i Netflix, një prodhim italian me regji të Andrea De Sica-s dhe Anna Negri-t, që u publikua fillimisht në 30 nëntor 2018, me një sezon të dytë që doli një vit më pas.
Kush janë dy vajzat protagoniste!
Heroina jonë është Chiara (Benedetta Porcaroli), e cila ëndërron të studiojë në Amerikë bashkë me shoqen e saj Camilla (Chabeli Sastre Gonzalez) dhe shokun Fabio (Brando Pacitto).
16-vjeçarja me prindër të ndarë por që jetojnë bashkë “për hir të vajzës” thotë se në Romë je e detyruar të bësh një jetë të fshehtë (si psh të kryesh marrëdhënie seksuale me vëllain e shoqes Camilla, i cili është i lidhur me vajzën më të famshme të shkollës) dhe bën çmos që të largohet në SHBA, madje edhe të falsifikojë firmën e prindërve të saj.
Në këtë moment ajo takon brunen simpatike Ludovica (Alice Pagani), e cilësuar si një “vajzë e keqe” pasi një video seksi e saj iu bë publike nga ish-i dashuri. Ludovica si një mjeshtre e falsifikimit ia firmos dokumentin Chiara-s por miqësia që lind më pas mes tyre, e bën atë të pendohet për largimin.
Nga ana tjetër kemi një protagonist të ri, me ardhjen në shkollë të të cilit, fillon dhe lëviz çdo gur i mundshëm. Damiano (Riccardo Mandolini), është djali i një ambasadori nga një vend i Lindjes së Mesme, që merret nën kujdestarinë e këtij të fundit pasi i vdes e ëma. Ai njihet si një djalë i fortë moskokëçarës, që shet edhe marijuanë në shkollë, por kur sheh që pavarësisht pasurisë së madhe që ka nga i ati, ka një motor të vjetër që ia ka lënë e ëma kujtim, kupton që është tepër i brishtë.
Dashuri ka por është: E komplikuar!
Chiara kujton se ndjen vërtet për vëllain e shoqes së saj, Niccolo (Lorenzo Zurzolo). Ata vijojnë në sekret lidhjen e tyre dhe kanë komunikim vetëm në dhomën e gjumit, në atë të Chiara-s. Por kur takon Damianon, dhe ndan një moment special me të duke e ngushëlluar për motorin e të ëmës që ia kanë vjedhur, aty lind një ndjenjë e pastër mes të dyve që do të xhelozohet nga Niccolo!
Damiano bie edhe në syrin e shoqes së Chiara-s, Camilla-s, e cila nis të bëjë çmos që të lidhet me të, në një kohë që nuk e di se çfarë ka ndodhur mes Chiara-s dhe Damiano-s.
Ludovica nga ana tjetër përfshihet në një skemë mashtrimi, kur një burrë i quajtur Saverio (Paolo Calabresi) i premton asaj se do ta futë në club-in e tij falas dhe pa kartë identiteti. Ajo merr Chiara-n me vete dhe aty nis gjithçka!
https://www.instagram.com/p/Bq-EYSbhBzd/
Saverio mendon të fitojë para nga këto vajza që kërkojnë vetëm të argëtohen, duke i prezantuar me meshkuj që paguajnë për shoqërinë e tyre.
Saverio angazhon Fiore-n (Giuseppe Maggio), i cili dashurohet pas Ludovica-s, por e ka shumë të vështirë të shpëtojë nga kthetrat e parave dhe shpesh e dërgon atë vetë me duart e tij nëpër klientë. E trishtë apo jo!
Nuk e bëjnë për para, por paratë duhen!
Gjithçka nis si lojë! Saverio i propozon Ludovica-s që të shoqërojë një dentist në një darkë! “Vetëm kaq, shoqërim”, i thotë ai. Dhe Ludovica, e cila ka prindër të ndarë dhe e ëma i shpenzon paratë e shkollës së saj, nuk sheh asgjë të keqe këtu! Fundja një darkë do hanë apo jo!
Gjithçka duket shumë e thjeshtë në fillim! Vajzat fitojnë paratë e para dhe dalin bëjnë shopping, dhe shpenzojnë për qejfin e tyre! Por as nuk e kanë idenë se çfarë i pret!
A është histori e bazuar në një ngjarje të vërtetë?
Po, “Baby” bazohet në një histori të vërtetë tronditëse.
Seriali tregon historinë e dy vajzave adoleshente nga zona e pasur Parioli e Romës, që përfshihen në një rrjet shoqërimi dhe prostitucioni në kërkimin të “identitetit dhe pavarësisë ndaj sfondit të dashurisë së ndaluar, presioneve familjare dhe sekreteve të përbashkëta”.
Por “Netflix” ka theksuar më parë se seriali është bazuar në ngjarjen e cilësuar si “Baby Squillo” në Itali, që ndodhi në vitin 2013 dhe u zbulua në vitin 2014 në rrethin Parioli të Romës.
6 vjet më parë, dy vajza adoleshente, të moshës 14 dhe 15 vjeçare, u kapën duke kryer marrëdhënie seksuale për të blerë rroba, sende të shtrenjta dhe kokainë.
Të paktën 50 burra paguan për seks me dy adoleshentet. Skandali u zbulua pasi nëna e 15-vjeçares nuk mund ta kuptonte se nga po i gjente të gjitha paratë e bija dhe kontaktoi policinë.
Kjo çoi në arrestimin e tetë personave, përfshirë nënën e vajzës më të re, e cila po i prezantonte ato me klientët, sipas “Huffington Post”.
Muzika, thjesht e adhurueshme!
Seriali ka një repertor të mrekullueshëm muzikor, disi të kombinuar mes këngëve në anglisht dhe atyre italiane. Por ajo më e veçanta që u përshtatet më së shumti dy vajzave është ripunimi i “Girls just wanna have fun” nga Chromatics, apo “Wasting my young years” nga London Grammar.
https://www.instagram.com/p/BoRUrVRCEJ-/
Ndërsa vajzat kërcejnë nën ritmet e muzikës “Girls just wanna have fun”, ne dëgjojmë zërin e Chiara-s që thotë: “Gjëja më e mirë e të paturit të një jete sekrete, është se kurrë nuk e di se çfarë të pret”.
