Supermodelja Naomi Campbell i ka surprizuar të gjithë ditën e sotme teksa ka zbuluar se është bërë nënë për herë të parë. Naomi ka ndarë në Instagram një foto të këmbës së fëmijës dhe i ka dedikuar disa fjalë shumë të ëmbla.
“Një bekim i bukur i vogël më ka zgjedhur mua që të jem nëna e saj. Jam e nderuar që kam këtë shpirt të pastër në jetën time. Nuk ka fjalë për ta përshkruar lidhjen e përjetshme që unë ndaj tashmë me ty engjëlli im i vogël. Nuk ka dashuri më të madhe”, ka shkruar modelja 50-vjeçare.
Modelja ka etiketuar në postim nënën e saj, Valerie Morris-Campbell, pa dhënë detaje të tjera.
Ky lajm vjen pak kohë pasi Naomi pranoi se ajo mendon të ketë një fëmijë, por nuk dëshiron të nxitojë veten për krijimin e një familjeje.
“Mendoj gjatë gjithë kohës që të kem një fëmijë. Por tashmë me zhvillimin e shkencës mendoj se mund ta bëj këtë gjë kur të dua unë”, u shpreh modelja në një intervistë për revistën “ES” në vitin 2017.
Kur u pyet nëse dëshiron të bëj një fëmijë vetë apo ta adoptoj, ajo u përgjigj: “Ndoshta, ndoshta…ndoshta”.
Megjithatë modelja insistoi se nuk dëshiron të jetë një nënë beqare, kështu që duhej të gjente një partner të përshtatshëm si fillim.
“E dua figurën e babait. Mendoj se është e rëndësishme”, u shpreh Naomi asokohe.
Më vonë në 2019-n ajo tha se nuk ishte ende gati për një fëmijë, duke shtuar se do të priste se çfarë do t’i sillte universi.
