Kosova feston sot 10-vjetorin e pavarësisë dhe për këtë prej ditësh është duke u përgatitur një festë madhështore. Pjesë e organizimit ka qenë edhe përgatitja e një slogani të fuqishëm që do të ketë impakt të madh në media dhe në publik.
“Bac çikat na zbardhën ftyrën”, është slogani i përgatitur nga grupi “Kosova 10” dhe në të shfaqen pamjet e Rita Orës, Dua Lipës dhe Majlinda Kelmendit.
Në këtë slogan bie në sy mungesa e Era Istrefit, për të cilën stafi organizativ është shprehur se këngëtarja nuk është ende në kalibrin e Ritës dhe Dua-s. Kjo deklaratë me sa duket ka revoltuar nënën e Erës e cila ka bërë një prononcim për “Express”.
“Njerëz shumë më të mençur se ata që e kanë dizajnu/ shkru edhe se unë, e kanë shti Erën në listën e personave më të suksesshëm shqiptar, e ata që nuk e kanë shti hiç nuk është problem. Jeta është e gjatë. Suksesi i Erës është i pakrahasueshëm edhe me të Ritës edhe me të Duas. Pse është i pakrahasueshëm sepse e dimë të gjithë”, tha nëna e Erës.
Ajo theksoi se Era është e vetmja që ka arritur që direkt nga një vend i vogël si Kosova të bëhet e njohur në tërë botën.
“Prej një vendi të vogël një sukses që e ka arrit Era, deri sot nuk e ka arrit asnjë artist, asnjë artist i filmit as muzikës popullore, as pop, ama bash kërkush. Dua dhe Rita kanë arritur shumë po prej një vendi që është njëri prej vendeve ma me perspektivë dhe ma të zhvillum në botë. Unë jam ajo nana më krenare në botë që asnjë nanë nuk e ka përjetu suksesin e fëmiut të vetë si unë”, u shpreh për fund Suzana Istrefi, nëna e dy këngëtareve shumë të suksesshme të momentit.
