Vrasja e 35-vjeçarit grek ditën e djeshme në Gjirokastër indinjoi bashkëkombësit e tij, të cilët protestuan para Ambasadës shqiptare në Athinë. Jo vetëm kaq, por edhe tonet e përdorura nga zyrtarët grekë ishin të ashpra.
Nëna e të ndjerit Kostandin Kacifas tregon mes lotësh dhimbjen e saj për humbjen e të birit.
“Përse duhet të vritej fëmija im?! Djali ishte i gëzuar që dje kishte festë. Shqiptarët nuk e donin minoritetin”, tha nëna e 35-vjeçarit.
Në një prononcim për median greke “Protothema”, ajo u shpreh se tashmë nuk e do jetën pa djalin e saj.
“Tani nuk e dua jetën pa fëmijën tim, pa shpirtin tim”, u shpreh nëna Kostandin Kacifas.
Mësohet se dy motrat e viktimës, që jetojnë prej vitesh në Athinë shkuan në fshat gjatë natës, për t’i qëndruar pranë nënës së tyre.
Ngjarja nisi rreth orës 10:00 të së dielës, kur Kostandin Kacifas filloi të gjuante me armë zjarri në ajër, duke shkaktuar panik tek banorët e zonës, të cilët ishin mbledhur në qendër për të festuar festën e Greqisë.
Pasi pa uniformat blu të afroheshin në drejtim të tij ai hapi zjarr me breshëri ndaj punonjësve të policisë, duke rrezikuar jetën e tyre. Kacifas më pas u fsheh për rreth 4 orë në thellësi të fshatit Bularat të Gjirokastrës, ku mes tij dhe forcave të policisë pati shkëmbim zjarri.
Burimi: BalkanWeb
