Kantautori Flori Mumajesi së bashku me një pjesë të grupit “Threedots” kanë performuar në orët e para të mëngjesit në një nga klubet e Tiranës. Por këngëtari nuk duket i kënaqur me kushtet e punës, si dhe me menaxherët dhe pronarët e klubeve, ku artistët shqiptarë performojnë.
Në një postim në profilin e tij në “Instagram” në krah të DJ Vicky-t, Flori shkruan: “Kemi shumë data të mbyllura ndërkohë dhe sigurisht do t`i realizojmë, pa marr parasysh kushtet e tmerrshme të vendeve ku këndojmë dhe pse bëjmë si “ARTISTA”… “Njerëzit” me të cilët bashkëpunojmë, organizatorë, “menaxherë” sekserë apo pronarë, fatkeqësisht 70% nuk kanë lidhje fare me muzikën, edhe pse ndihen më “ARTIST” se vetë “ARTISTI”, të cilin kanë ftuar dhe mezi e kanë siguruar! Ndoshta disa do kënaqen, ska gjë unë gjithmonë kam preferuar të flas me punë!”
Sakaq, Flori nuk i kursye fjalët e ndjera për publikun, që e kishte kthyer mbrëmjen e djeshme në një mbrëmje të veçantë për të.
“Dje, një nga mbrëmjet më të bukura në Tiranë. Ju pashë në sy të gjithëve, ju përshëndeta të gjithëve dhe e lëshova shpirtin sikur të ishte nata e fundit që do isha pranë jush… Nuk e di kur do të rishihemi, por e di se do të më mungoni.”-shkruan kantautori.
Këngëtari i hitit “Me fjalë të vogla” premtoi se do të realizojë datat e pakta të koncerteve që ka deri në fund të vitit 2018 dhe më pas do të bëjë një periudhë shkëputje.
