Ndonëse prej disa javësh vendi ynë ka nisur jetën normale pa kufizime dhe izolim, përkeqësimi i situatës ditët e fundit, që lidhet me shtimin e rasteve të reja dhe shtrimet në spitalin Infektiv, ka ngjallur frikën për kthimin pas dhe vendosjen e karantinës.
Edhe pse plazhi që e pritëm më padurim u hap më 1 qershor, raportimi i 82 rasteve të reja me Covid-19 nga Ministria e Shëndetësisë ka ngritur pikëpyetje rreth kësaj çështjeje dhe sigurisë në plazhe.
Mirëpo, për mjekun Pëllumb Pipero nuk ka dyshime: Mund të bëjmë plazh sa të duam, mjafton të respektojmë protokollet.
Teksa ishte i ftuar në ‘Tempora’, mjeku u pyet nga gazetarja Sonila Meço nëse është me rrezik kjo gjë, duke shtuar se e bija i ka treguar se ka frikë të shkojë në plazh pasi ka dëgjuar se njerëzit kanë koronavirus.
Mirëpo, infeksionisti i bëri thirrje të jetë e qetë duke ritheksuar se virusi nuk transmetohet përmes ujit dhe rërës në det.
“Unë i them se jo vetëm të mendojë se do të shkojë, por duhet të shkojë sepse duhet ta dijë se virusi nuk transmetohet përmes ujit, ushqimeve, apo nëse shkojmë në plazh me familjen tonë. Nëse ruajmë protokollet që janë vendosur, që janë kujdesi për duart dhe distanca fizike. Të jetë e qetë se nuk ka korona në bregdet dhe nuk transmetohet në det.”
Kujtojmë se disa ditë më parë, një urdhër i përbashkët i Ministrisë së Turizmit dhe asaj të Shëndetësisë ka përcaktuar “Protokollin e masave anti-COVID-19 përgjatë sezonit turistik”, duke ndryshuar rrënjësisht mënyrën e të bërit plazh.
Hapësirat midis çadrave do të jenë minimumi nga 3.5 metra, ndërsa në hotele, do të ketë rregulla të rrepta për distancën, ku personeli do të duhet të mbajë një pastërti absolute.
Për të lexuar protokollin e plotë kliko KËTU.
