Presidenti i Brazilit, Jair Bolsonaro, ka rezultuar pozitiv me Covid-19. Ai lajmëroi ditën e djeshme se ka shfaqur të gjitha simptomat e virusit dhe se i është nënshtruar tamponit, rezultati i të cilit ka dalë sot.
Bolsonaro, 65 vjeç, tha në një intervistë për “CNN” në Brazil se ka pasur temperaturë deri në 38 gradë dhe disa simptoma të tjera, teksa për shkak të tyre, axhenda e tij për pjesën tjetër të javës u anulua.
Ndërkohë Brazili është vendi i dytë në botë pas SHBA për numrin më të lartë të të infektuarve dhe të vdekurve nga Covid-19.
Brazili, shteti me popullsinë më të madhe në Amerikën Latine, me rreth 211 milionë banorë, ka konfirmuar rastet e para me Covid-19 më 26 shkurt, dhe ka kaluar shifrën prej 1 milion rastesh më 19 qershor.
Ekspertët thonë se numrat real mund të jenë shumë më të larta, për shkak se në vend ka mungesë të testimeve në masë.
Presidenti brazilian, Jair Bolsonaro është kritikuar për shkak të mënyrës se si po e menaxhon krizën. Ai ka kritikuar rregulla si distancimi social dhe mbajtja e maskës, duke i konsideruar si më të rrezikshme se vetë virusi.
Mirëpo, tashmë që ka rënë vetë pre e virusit famëkeq, Bolsonaro duket se ka ndryshuar mendim dhe ka nisur ta konsiderojë distancimin social një masë të nevojshme.
Në daljen e tij para brazilianëve, ku i lajmëroi se është prekur nga Covid-19, ai kishte veshur maskë dhe paralajmëroi njerëzit që të mos afroheshin pranë tij. “Ju nuk mund të afroheni shumë pranë meje, OK? Rekomandim për të gjithë,” tha Bolsonaro.
Presidenti Bolsonaro mori pjesë të shtunën në një drekë që u organizua nga Ambasade e SHBA në Brazil në nder të festës së Pavarësisë se shtetit amerikan dhe nuk dihet se me sa persona ka patur kontakt.
