Po bëhen gati 8 muaj që aktorët nuk ngjiten në një skenë të mirëfilltë teatri dhe duket se kjo gjendje do të zgjasë për shumë kohë. Ministria e Shëndetësisë urdhëroi para 1 jave rihapjen e kinemave, ndërkohë që për teatrin gjithçka u kalua në heshtje. Pavarësisht se teatri dhe kinemaja funksionojnë thuajse njësoj, pushtetarët mendojnë ndryshe për njërën e ndryshe pëër tjetrën.
Drejtuesit e teatrove në vend e kanë cilëusuar këtë vendim të Ministrisë së Shëndetësisë si skandaloz dhe kanë treguar se shumë aktor kanë mbetur pa rrogë. (KLIKO)
Problemi nuk është vetëm pandemia për artistët!
Artistët e mirënjohur të skenës së teatrit thonë se problem për ta nuk është pandemia. Sipas tyre prej 30 vitesh nuk është bërë asgjë për artin në Shqipëri, sepse nuk ka pasur asnjëherë strategji afatgjatë.
“Në momentin e mbylljes për shkak të COVID 19 hodha idenë që Ministria e Kulturës të organizonte punën për të arritur në një deduksion, sa i përket strategjisë së ligjit të arteve edhe rregullimit me ligj të krijuesve edhe interpretuesve, çka do të lehtësonte ballafaqimin më pas të kësaj shtrese me masat anticovid. Kjo gjë nuk u bë edhe kaluam nga kriza në krizë. Gjendemi në situatën që sallat e teatrove edhe trupat artistike, janë shumë herë më të sigurta ndaj çdo lloj grumbullimi tjetër. Por pikërisht këto nuk hapen”, është shprehur aktori Genc Fuga për Report Tv.
Edhe artisti Arben Derhemi ka shprehur të njëjtën gjë, duke shtuar se me politikat e Ministrisë së Kulturës nën drejtimin e Elva Margaritit kanë rënë nga shiu në breshër.
“Këtë situatë më shumë se të ndikuar nga COVID 19, po e trashëgojmë nga mungesa e politikave nga Ministria e Kulturës. Nuk e imagjinoja kurrë që pas një pune kaq të lodhshme, sa i përket teatrit apo politikave për teatrin, kulturën dhe statusin e artistit, të arrinim në një pikë, ku interesi i MK është zero për kulturën, aq sa mund të themi se ‘kemi rënë nga shiu në breshër’ Në facebook nxjerr thënie të njerëzve të famshëm, por MK nuk mund të funksionojë në këtë mënyrë”, është shprehur Derhemi, duke shtuar këtu se Ministria e Kulturës nuk jep fonde e nuk mbështet projektet e artistëve.
Ndërhyrja e politikës në art
Të dy aktorët e mirënjohur e kanë cilëusar si fatkeqësi ndërhyrjen e politikës në art, duke ndikuar në përçarjen mes artistëve. Një pjesë e projekteve artistike këto kohë janë prezantuar në ambientet e Kryemnistrisë ose Presidencës dhe Genc Fuga i konsideron këto thjesht si arna.
“Jemi në momentet që krijimtaria artistike edhe interpretimi i saj nuk është në vendin e duhur. Faleminderit që më hapët derën. Një artisti i hapet dera në një institucion të caktuar, edhe një tjetri në një tjetër. Nuk do t’i konsideroja brenda natyrës thelbësore dhe misionit që ka një aktor. Janë arna shumë të bukura, por mbeten arna”, është shprehur Fuga.
