Këngëtari 58-vjeçar Notis Sfakianakis u ngjit dje për herë të parë në skenën e Pallatit të Kongreseve.
Në mesin e koncertit shumë të përfolur, ai ndërpreu këngën dhe për gati pesë minuta ka mbajtur një fjalim në skenë, duke iu drejtuar të pranishmëve lidhur me deklaratat raciste ndaj shqiptarëve për të cilat akuzohet.
Sfakianakis mohoi para spektatorëve se i ka ofenduar shqiptarët dhe ndër të tjera tha se shqiptarët janë komb i lashtë e me histori.
“Nuk i kam fyer kurrë shqiptarët. Kanë shtrembëruar fjalët e mia. Ju jeni një komb i lashtë dhe me histori”, thuhet të ketë theksuar këngëtari grek sipas “Newsbomb”.
Pak ditë më parë personazhe të njohur shqiptarë, mes të cilëve Flori Mumajesi, Jonida Maliqi etj, bënë thirrje për bojkotimin e koncertit të tij, pasi këngëtari është mbështetës i partisë nacionaliste greke “Agimi i Artë” që bën deklarata raciste ndaj shqiptarëve.
