Sot është dita e lumturimit të Nënë Terezës, shenjtores shqiptare që u kthye në simbolin e humanizmit për botën. Për të kujtuar veprën e saj ndër vite, kryebashkiaku Erion Veliaj bahskë me reperin Noizy shtruan një drekë të veçantë për personat në nevojë që frekuentojnë qendrat sociale.
Dreka e shërbyer në mjediset e Qendrës Sociale “Të Qëndrojmë së bashku” është në shenjë falënderimi e promovimi të vlerave të shpirtit bujar dhe ndjenjës së shpresës.
“Jam shumë i lumtur që jam sot bashkë me Noizy-n në ditën e Nënë Terezës, për t’u shërbyer atyre që nuk kanë të gjitha mundësitë që ndoshta ka shumica e Tiranës, që janë të moshuar dhe fëmijët i kanë larg. Në ditën e Nënë Terezës, mënyra më e mirë për ta përkujtuar atë është duke u shërbyer atyre që janë më nevojtarë. Sot bëmë diçka të vogël me dashuri të madhe, që shpresoj se do të kopjohet nga të gjithë. Besoj se kjo energji dhe kjo dashuri që na frymëzon vepra e Nënë Terezës, të lërë një impakt në qytetin tonë dhe në çdo cep të Tiranës ku ka nevojë për më shumë solidaritet”, tha Veliaj.
Këngëtari i njohur Rigels Rajku, ose siç njihet nga të gjithë Noizy, u shpreh:
“Është kënaqësi shumë e madhe, sepse të moshuarit kanë nevojë për ne dhe ne kemi nevojë për ta, pavarësisht rrethanave të jetës për disa prej tyre. Ndjesia është shumë e mirë, shumë e veçantë. Gjërat materiale shkojnë e vijnë, ndërsa veprat që bëjmë për njerëzit në nevojë mbeten”.
Dreka mund të jetë shërbyer edhe një ditë më parë, pasi ditën e sotme Ermal Mamaqi postoi një foto me Veliajn në avion.
“Kur të bie sedilja ngjitur me Kryetarin… “Bussines Class” ta shpif, prandaj më sollën këtu te radha 23”, shkruan Mamaqi.
